வீராம்பட்டினம்

புதுச்சேரி மாநிலத்தில் உள்ள புகழ்பெற்ற சக்தி தலமான வீராம்பட்டினம் செங்கழுநீர் அம்மன் திருக்கோயில் வரலாறு :

மரமே மூலவராக விளங்கும் ஆலயம், மீனவ சமுதாயத்தின் காவல் தெய்வம், என்ற பெருமைகளை கொண்டு திகழ்வது, புதுச்சேரி வீராம்பட்டினம் செங்கழுநீர் அம்மன் ஆலயம்.

மரமே மூலவராக விளங்கும் ஆலயம், மீனவ சமுதாயத்தின் காவல் தெய்வம், புதுச்சேரி மாநிலத்தின் புகழ்பெற்ற அம்மன் ஆலயம் என பல்வேறு பெருமைகள் கொண்ட திருக்கோவிலாகத் திகழ்வது, புதுச்சேரி வீராம்பட்டினம் செங்கழுநீர் அம்மன் ஆலயம்.

ஆண்டுதோறும் எல்லாக் கோவில்களில் விழாக்கள் நடைபெறுவதும், அதில் முக்கிய விழாவாகத் தேர்த் திருவிழா கொண்டாடப்படுவதும் வழக்கமான ஒன்றுதான். ஆனால் செங்கழுநீர் அம்மன் ஆலயத்தில் நடைபெறும் தேர்த் திருவிழாவை, மாநில ஆளுநரும், முதல்- அமைச்சரும் சேர்ந்தே வடம் பிடித்து இழுத்து வைப்பார்கள். இது இன்று, நேற்றல்ல.. பிரெஞ்சு ஆட்சிக்காலத்தில் இருந்தே தொடர்ந்து நடைபெற்று வரும் வழக்கம்.

மூலவர்: செங்கழுநீர் அம்மன்

ஊர் : வீராம்பட்டினம்

மாநிலம்: புதுச்சேரி

பழமை: 1000  வருடங்களுக்கு மேல்

தல வரலாறு:

சுமார் 1000 ஆண்டுகளுக்கு முன்பு வீரராகவர் என்ற மீனவர் இவ்வூரில் வாழ்ந்து வந்தார். அவர் அதிக தெய்வ பக்தி கொண்டவர். ஒரு நாள் காலை இவர் தன் தோளில் மீன்பிடிக்கும் வலையை சுமந்து, ஊருக்கு அருகேயுள்ள செங்கழுநீர் ஓடைக்கு சென்று மீன் பிடிப்பதற்காக வலையை வீசினார். காலையிலிருந்து வலை வீசி ஒரு மீன் கூட கிடைக்காததால் வீரராகவர் கவலைப்பட்டார். கடைசி முறையாக ஓடையில் வலைவீசி இழுத்த போது, வலை கனமாக இருப்பதைக் கண்டார். வலை கனமாக இருப்பதால் சிக்கியிருப்பது மீன்தான் என்று நினைத்து சந்தோஷத்துடன் இழுத்துக்கொண்டே வந்தார். ஆனால் சிக்கியிருந்தது மீனுக்கு பதில் உருண்டையான மரக்கட்டை. ஆண்டவன் இன்று நமக்கு அளித்த படி இது தான் என்று நினைத்தபடி இந்த மரக்கட்டடையை வீட்டிற்கு எடுத்துச்சென்று கொல்லைப்புறத்தில் போட்டார்.

சில நாட்களுக்குப்பின் அடுப்பு எரிப்பதற்காக விறகு இல்லாமல் போகவே வீரராகவரின் மனைவி வீட்டின் பின் புறத்தில் இருந்த மரக்கட்டையை உடைத்து உபயோகிக்க கோடாரியால் மரத்தை பிளக்க முயன்றார். மரத்துண்டின் மீது கோடாரி பட்டதும் மரக்கட்டை பிளக்கவில்லை. அதற்குப்பதில் கோடாரி பட்ட இடத்திலிருந்து ரத்தம் பெருகியது. இதனால் வீரராகவரின் மனைவி பதறிப்போனார். இந்த செய்தியறிந்த அந்த ஊர் மக்கள் இந்த அதிசயத்தை வந்து கண்டனர். தகவலறிந்து வந்த வீரராகவரும் அந்த மரக்கட்டையை வீட்டினுள் எடுத்து வந்து சந்தனம், குங்குமம் இட்டு பூஜை செய்தார். இந்த நிகழ்ச்சிக்குப்பின் வீரராகவரின் வாழ்க்கை வளமையானது.

ஒரு நாளிரவு வீரராகவர் கனவு ஒன்று கண்டார். அந்த கனவில் அம்மன் தோன்றி அவரிடம் “பக்தனே, பல்லாயிரம் ஆண்டுகளுக்கு முன்பு தெய்வீகம் பெற்ற ரேணுகை தான் நான். நான் அன்னை பராசக்தியின் அம்சம். இந்த பகுதி மக்கள் செய்த தவத்தின் பயனாக இங்கு கோயில் கொண்டு அருள் வழங்க வந்துள்ளேன். என் வருகையின் அடையாளமே, உன்னிடம் உள்ள மரத்துண்டு. எனவே நான் குறிப்பிடும் இடத்தில் அந்த மரத்துண்டை பீடமாக தாபித்து, அதன் மேல் என் திருவுருவை விக்கிரகமாக பிரதிட்டை செய்து வழிபட்டு வா. என் திருமேனியை பிரதிட்டை செய்ய நான் குறிப்பிடும் இடத்தில் பல்லாயிரம் ஆண்டுகட்கு முன்பு வாழ்ந்து மறைந்த சித்தர்பீடம் ஒன்று உண்டு, அதுவே எனக்கேற்ற இடம், மேலும் என்னை செங்கழுநீர் அம்மன் என்று அழையுங்கள்” என்று கூறி விட்டு அன்னை மறைந்தாள்.

ஊர் மக்களிடம் கூறினார். அவர்கள் அனைவரும் ஒன்று கூடி அம்மன் குறிப்பிட்ட இடத்தை தேடினர். அப்போது புதர் அடர்ந்த, பாம்பின் புற்று வளர்ந்தோங்கிய இடம் ஒன்றைக் கண்டனர். ஊர்மக்களின் சத்தத்தால் புற்றிலிருந்து மிகப்பெரிய பாம்பு ஒன்று வெளிவந்தது. அது தனது படத்தால் ஒரு குறிப்பிட்ட இடத்தில் பூமியை மூன்று தடவை அடித்து, விக்ரக பிரதிட்டை இடத்தை காண்பித்து விட்டு புற்றுக்குள் சென்று மறைந்தது. நாகம் குறிப்பிட்ட இடத்தை தோண்டி சுத்தம் செய்தனர். அதன் மீது முன்பு வலையில் கிடைத்து, வீரராகவர் வீட்டில் இருந்த மரத்துண்டை பீடமாக அமைத்தனர். அதன் மேல் கழுத்துக்கு மேல் உள்ள அம்மனை எழுந்தருளச் செய்து, அதற்கு “செங்கழுநீர் அம்மன்” என்ற திருநாமம் இட்டனர்.

ஆலயம் அமையும் இடத்தைச் சுட்டிக்காட்டிய அந்த நாகம், புற்றுக்கும் கோயிலுக்குமிடையே போய்வந்துகொண்டிருந்தது. அன்னையின் திருமேனியில் ஏறி அணிகலனாய் சுற்றிக்கொண்டும் அடிக்கடி காட்சி தந்தது! அந்த நாகத்தையும் தெய்வச் சின்னமாகவே கருதி மக்கள் வழிபட்டு வந்தனர். காலங்கள் உருண்டோடின. ஆதியில் பீடமும் சிரசும் பிரதிஷ்டை செய்யப்பட்ட கருவறையில் தேவதாரு மரத்தால் தேவியின் முழு உருவமும் அமைக்கப்பட்டது. முன் கோபுரம், சுற்று மதில்கள், பிராகார மண்டபம் அழகிய  சுதைச் சிற்பங்கள் என்றெல்லாம் சிறப்புற அமைந்தன.

கோயிலின் முதல் தேரோட்டம் 1619ம் ஆண்டு (நளவருடம் ஆடி மாதம்) ஆகஸ்டு மாதம் 13ம் தேதியன்று நடைபெற்றது. பிரெஞ்சுகாரர்கள் காலத்தில் ஒருமுறை கடலில் பயணம் செய்த பிரெஞ்சு கவர்னர் தேர்த் திருவிழாவின்போது வெடிக்கப்பட்ட வாண வேடிக்கைகளின் சப்தம் கேட்டு வீராம்பட்டினத்தில் தேர்த்திருவிழா நடைபெறுகிறது என்பதையறிந்து வீராம்பட்டினத்திற்கு கரையிறங்கி வந்ததாகவும், வீராம்பட்டினம் மக்கள் கவர்னரை வடம் பிடித்து தேரோட்டத்தை துவக்கி வைக்க வேண்டிக்கொள்ள, கவர்னர் விழாவில் கலந்து கொண்டதாகவும் தெரிகிறது. அன்றிலிருந்து இன்றுவரை கவர்னர் அவர்கள் தேரை வடம் பிடித்து துவக்கி வைப்பது வழக்கமாக இருந்து வருகிறது.

புதுவை மாநிலத்தின் தொன்மைக்கு எடுத்துக்காட்டாய் விளங்குவது, அரிக்கமேடு பகுதி. இங்கு பழங்காலத்தில் ரோமானியர்களோடு நெருங்கிய வாணிபத் தொடர்பு இருந்து வந்ததை வரலாறு நமக்கு எடுத்துக் காட்டுகிறது. அத்தகைய சிறப்புமிகு அரிக்கமேடு பகுதியை அடுத்து உள்ள கடலோர கிராமம் தான் வீராம்பட்டினம். இங்கு தான் பழம்பெருமை வாய்ந்த செங் கழுநீர் அம்மன் திருக்கோவில் கொண்டுள்ளாள்.

தல பெருமை:

இந்த ஆலையத்தில் உள்ள தேவதாருவின் முழு உருவம் மரத்தால் செய்யப்பட்டடு அமைக்கப்பட்டது.

தொடக்கத்தில் இந்த செங்கழுநீர் அம்மனை பரதவர் இனமே வணங்கி வழிபட்டு மகிழ்ந்தது. பின்னர், புதுச்சேரி மற்றும் தமிழகத்திலுள்ள பல பரம்பரைகள் செங்கழுநீர் அம்மனை தங்கள் குலதெய்வமாக வணங்கி வருகின்றனர்.

இங்கு தேர்த்திருவிழாவை புதுச்சேரி ஆளுநர் தேர் வடத்தை இழுத்து விழாவை தொடங்கிவைப்பது இன்றும் வழக்கத்தில் இருக்கிறது.

பரிகாரத் தலம் : 

தீராத நோய் தீர, கண் பார்வைக் கோளாறு நீங்க, திருமணப் பேறு, குழந்தைப் பேறு வேண்டுவோர் எனப் பலருக்கும் கண்கண்ட தெய்வமாக இவ்வம்மன் விளங்குவதால், அன்னையை நாடி வரும் பக்தர்கள் எண்ணிக்கை கூடிக் கொண்டே வருகிறது. ஒவ்வொரு ஆண்டும் ஆடி மாதம் முதல் வெள்ளியில் இருந்து ஆறு வெள்ளிக்கிழமைகள் வரை வீராம்பட்டினம் விழாக்கோலம் பூண்டிருக்கும்.

திருவிழா:

ஒவ்வொரு ஆண்டும் ஆடி மாதம் முதல் வெள்ளிக்கிழமையிலிருந்து ஆறு வெள்ளிக்கிழமைகள் தொடர்ச்சியாக வீராம்பட்டினமே திருவிழாக்கோலம் பூண்டிருக்கும். ஐந்தாம் வெள்ளியன்று தேர்த்திருவிழா நடைபெறும். ஆறாம் வெள்ளியன்று முத்துப் பல்லக்கு திருவிழா நடைபெறும். அலங்கிரிக்கப்பட்ட தேரில் செங்கழுநீரம்மன் தேரடி வீதியில் உலா வந்து தேர் முற்றத்தில் வந்து நிற்கும். இந்த தேர் திருவிழாவின் சிறப்பு, பிரஞ்சு ஆட்சிக்கலாம் முதலே கவர்னர் தேரின் வடம் பிடித்து தேரோட்டத்தை தொடங்கிவைப்பர். இந்த வழக்கம் இன்றும் அனுசரிக்கப்படுகிறது.

ஆலயம் தினமும் காலை 6 மணி முதல் பகல் 12.30 மணி வரையும், மாலை 4.30 மணி முதல் இரவு 9 மணி வரையும் தரிசனத்திற்காக திறந்திருக்கும்.

அமைவிடம் : புதுச்சேரி- கடலூர் நெடுஞ்சாலையில் உள்ளது அரியாங்குப்பம். இங்கிருந்து 2 கிலோமீட்டர் தொலைவில் வீராம்பட்டினம் உள்ளது. புதுச்சேரி பேருந்து நிலையத்தில் இருந்து வீராம்பட்டினத்திற்கு டவுன் பஸ் வசதியும் உண்டு.

ஓம் சக்தி 

.  நன்றிகள் திரு தமிழ் பிரியன் ஐயா அவர்கள். 

தாணுமாலய_சுவாமி

கன்னியாகுமரி மாவட்டம், சுசீந்திரம் எனும் ஊரில் அமைந்துள்ளது தாணுமாலயன் கோயில். சிவன், விஷ்ணு, பிரம்மா ஆகிய முப்பெருங்கடவுள்களும் ஒன்றின் மேல் ஒன்றாக அமைந்துள்ள இக்கோயில் தாணுமாலயன் கோயில் என அழைக்கப்படுகிறது.

இறைவன் : தாணுமாலயர்தாயார் : அறம் வளர்த்த நாயகி

தல தீர்த்தம் : பிரபஞ்ச தீர்த்தம் தல விருச்சகம் : கொன்றை

தாணு (சிவன் ),மால் (விஷ்ணு ),அயன் (பிரம்மா)ஆகியோர் இணைந்ததே தாணுமாலயர் என்ற பெயராகும் ,திருமாலை முடியிலும்,பிரம்மாவை அடியிலும் தன்னை நடுவிலும் வைத்து ஈசன் காட்சிதரும் இடமே சுசீந்திரம் ஆகும் . அகலியால் சாப விமோச்சனம் பெற்ற இந்திரன் இவ் தளத்திற்கு வந்து இறைவனை வணங்கிய பின்னரே சாப விமோச்சனம் பெற்றதாக சுசீந்திர ஸ்தல வரலாறு கூறுகிறது .

புராண வரலாறு:

இன்று சுசீந்திரம் என்று அழைக்கப்படும் பகுதியே முன்னொரு காலத்தில் ஞானாரண்யம் என்று அழைக்கப்பட்டது. இது அடர்ந்த வனம் நிறைந்த பகுதியாக இருந்தது . இந்த வனத்தில் ஒரு பகுதியில், ஆஸ்ரமம் அமைத்து அத்திரி மகரிஷி தன்னுடைய தர்மபத்தினியான, அனுசூயாதேவி உடன் வாழ்ந்து வந்தார்.

அத்திரி முனிவரும், அவருடைய இல்லத்தரசியும் கற்புக்கரசியுமான அனுசுயாவும் ஞானாரண்யம் எனும் பழம்பெயர்பெற்ற சுசீந்திரத்தில் தவம் செய்தனர். இந்நிலையில், அத்திரி முனிவர் இமயமலைக்குச் சென்றார். அப்போது சிவபெருமான், விஷ்ணு, பிரம்மா ஆகிய முப்பெருங்கடவுள்களும் அனுசுயாவின் கற்பை சோதிக்க எண்ணி பிராமணர் வேடம் அணிந்து, அவருடைய ஆசிரமத்திற்கு வந்து உணவு தருமாறு வேண்டினர். அனுசுயாவும் உணவு படைக்கத் தொடங்கினார். அப்போது மூவரும், ”ஆடை அணிந்த ஒருவரால் உணவு பரிமாறப்படுமாயின் உணவு உண்ண ஆகாது” என்று கூறினர். இதைக் கேட்டு திடுக்கிட்ட அனுசுயாதேவி, தன் கணவர் திருவடி கழுவிய நீரை மூவர் மீதும் தெளித்தார். அவர்கள் மூவரும் பச்சிளங்குழந்தைகளாக மாறினர். பின்பு அந்தப் பச்சிளங்குழந்தைகளுக்கு உணவூட்டி, தொட்டிலிட்டு, தாலாட்டித் தூங்கச் செய்தாள். தங்கள் கணவர்கள் பச்சிளங்குழந்தையாக மாற்றப்பட்டதை அறிந்த மூவரின் தேவியரும் அங்கு வந்து அனுசுயாவிடம், தங்கள் கணவர்களை பழைய உருவிற்கு மாற்றித் தர வேண்டினர். தேவியர்கள் வேண்டுகோளுக்கிணங்கிய அனுசுயா முப்பெரும் கடவுளுக்கும் பழைய உருவைக் கொடுத்தாள். அப்போது திரும்பி வந்த அத்திரி முனிவரும் அனுசூயாவோடு சேர்ந்து, மும்மூர்த்திகளின் காட்சியைப் பெற்றார். இந்நிகழ்ச்சியை நினைவூட்டவே சுசீந்திரம் கோவில் கட்டப்பட்டுள்ளது என்கிறது இதன் தல வரலாறு.

அத்திரி முனிவரும், அனுசுயாவும் இங்குள்ள தல விருட்சமான கொன்றை மரத்தினடியில் நின்று வேண்ட மும்மூர்த்திகளும் காட்சி கொடுத்தனர். இதைக் குறிக்கும் விதமாக மும்மூர்த்திகளும் ஒரு முகமாய் தாணுமாலயன் என்ற பெயரில் இங்கு எழுந்தருளியுள்ளனர். சிவன் (தாணு), விஷ்ணு (மால்), பிரம்மா (அயன்) ஆகிய முப்பெருங்கடவுள்களும் சேர்ந்துள்ள இத்தல மூர்த்தி தாணுமாலயன் என அழைக்கப்படுகிறார்.

இக்கோயிலில் இறைவியாகக் கருதப்படும் அறம்வளர்த்த அம்மன் கதை ஒன்று உண்டு. சுசீந்திரம் ஊரை அடுத்த தேரூர் என்ற ஊரில் வாழ்ந்த பள்ளியறை நாச்சியார் என்ற கன்னி தாணு கோயிலுக்கு வந்தாள். கோயிலைச் சுற்றி வந்தபோது அவள் மாயமாக மறைந்தாள். இறைவன் அவளை ஆட்கொண்டான். இந்த நிகழ்ச்சி 1444-ஆம் ஆண்டு நடந்தாக புராணக்கதை தெரிவிக்கிறது. இதன் நினைவாக மாசிமாதம் திருக்கல்யாணம் நடக்கிறது.

பாணாசுரனை அழிக்க தேவி கன்னியாகுமரியாகப் பிறந்தாள். அவள் கன்னியாக இருக்கும்போது மட்டுமே அசுரனை வெல்ல முடியும் என்பது வரம். தாணு குமரி கல்யாணம் சூரியன் தோன்றும் முன் நடக்காமல், குமரி அசுரனை அழித்தாள்

பெயர்க் காரணம்:

தாணுமாலயன் கோயில் அமைந்துள்ள இடம் சுசீந்திரம் என அழைக்கப்படுகிறது. அகலிகையால் ஏற்பட்ட தேவேந்திரனுடைய சாபம் நீங்க தேவேந்திரன் இத்தலத்துக்கு வந்து மும்மூர்த்திகளை ஒரே சமயத்தில் வழிபட்டு விமோசனம் பெற்ற தலம் இது. சுசீ என்றால் தூய்மை என்று பொருள். இந்திரன் இங்கு தூய்மை பெற்றதால் சுசீந்திரம் என அழைக்கப்படலாயிற்று.

அனுமன் சிலை:

மேலக்கோபுர வாயிலுக்கு நிலத்தைத் தோண்டும்போது அனுமன் சிலை ஒன்று கிடைத்தது. 18 அடி உயரமுடைய இந்தச் சிலை 1929 ஆம் ஆண்டில் இராமபிரானின் கருவறைக்கு எதிரில் இருக்குமிடத்தில் நிறுவப்பட்டுள்ளது. இங்கு ஆஞ்சநேயர் வழிபாடு சிறப்பாக நடத்தப்பட்டு வருகிறது.

சிறப்புகள்:

இக்கோயில் 5400 சதுர அடி பரப்பளவில் அமைந்துள்ளது.

இக்கோயிலின் அரச கோபுரத்தின் உயரம் நூற்று முப்பத்தி நாலரை அடி இருக்கிறது.

இக்கோயிலில் கணபதியைப் பெண்ணுருவில் செதுக்கியுள்ள சிற்பம் உள்ளது. இதை “விக்கினேசுவரி” என அழைக்கிறார்கள்.

இக்கோயிலின் நவக்கிரகங்கள் ஒரே கல்லில் செதுக்கப்பட்டுள்ளது. இந்த நவக்கிரகங்களின் சிற்பங்கள் மேற்கூரையில் உள்ளன.

இங்குள்ள கோபுரம் நூற்றி முப்பத்தி நாலரை அடி உயரம் கொண்டது. ராஜ கோபுரம் ஏழு நிலைகளுடன் கம்பீரமாக காட்சி அளிக்கிறது . கோபுரத்தை முதலில் வணங்கி விட்டு உள்ளே சென்றால் 12 அடி உயரம் உள்ள நந்தியின் சிலையைக் காணலாம். கைலாசநாதர், அய்யனார், சிதம்பரேஸ்வரர் ஆகியோரும் காட்சி தருகின்றனர். அலங்கார மண்டபத்தில் உள்ள தூணில் பெண் வடிவ விநாயகர் வீற்றிருக்கிறார். நீலகண்ட விநாயகர் முன்பு உள்ள வசந்த மண்டபத்தின் கூரையில் 12 ராசிகளும், நவ கிரகங்களும் உள்ளன. வசந்த மண்டபத்தின் ஒரு தூணில், காலபைரவர் சிற்பம் உள்ளது. வடக்கு பகுதியில் ராமர் சன்னதி உள்ளது. இதில் ராமரும் சீதையும் வீற்றிருக்கின்றனர். வாயிலில் லக்ஷ்மணரும் ஆஞ்சநேயரும் நிற்கின்றனர். இந்தப் பிரகாரத்தில் சங்கீத தூண்கள் உள்ளது. இதில் உள்ள தூண்களை ஒவ்வொன்றாக தட்டினால் இதிலிருந்து,( sa, re, ga, ma ,pa ,da ,ni ) ச,ரி,க,ம,ப,த,நி. என்ற ஓசை எழும்பும். இதன் அருகில் சுப்பிரமணியன், கால பைரவர் ஆகியோரின் சன்னதிகள் உள்ளன.

தாணுமாலயன் சுவாமியின் கருவறையில், அர்த்த ஜாம பூஜைக்கான பூஜை பொருட்களை வைத்துவிடுவார்கள், மாலை நேர பூஜை செய்த அர்ச்சகர் மறுநாள் காலை பூஜை செய்ய வரக் கூடாது. என்னும் நியதி இங்கு உள்ளது. அர்த்த ஜாமத்தில் இந்திரனும் மற்ற தேவர்களும் இங்கு வந்து ஒவ்வொரு நாளும் தாணுமாலயனுக்கு பூஜை செய்வார்கள் முன்தினம் வைத்து பூஜை பொருள்கள் அனைத்தும் மாறுதல் அடைந்து இருக்கும். ‘அகம் கண்டதை புறம் கூறேன்’ என்று சத்தியம் செய்து கொண்டுதான் கோயிலின் வாசலை திறப்பார்கள். தாணுமாலய சுவாமியின், லிங்க வடிவில் கட்டப்பட்டுள்ள தங்க கவசத்தில், சுவாமியின் திருமுகம் அதன் மேல்புறம் 14 சந்திர பிறைகளும், அதன்மேல் ஆதிசேஷனும் காட்சியளிக்கின்றனர். கருவறைக்கு தென்புறம் விஷ்ணு சன்னதியும் ,செண்பகராமன் மண்டபமும் உள்ளன. இங்குள்ள 32 தூண்களிலும் கண்ணை கவரும் அழகு சிற்பங்களை காணலாம். விஷ்ணு சன்னதியில் எம்பெருமான் 8 அடி உயரத்தில் நின்றவாறு காட்சியளிக்கிறார். கருவறைக்குப் பின்னால் உள்ள பிரகாரத்தில் பெருமாள் பள்ளி கொண்ட கோலத்தில் காட்சி அளிக்கிறார் . அருகில் மூடு விநாயகர், துர்க்கை அம்மன் சங்கரநாராயணர் , சண்டிகேஸ்வரர், நடராஜர் சன்னதிகள் உள்ளன. இங்கு செப்பு சிலை வடிவாக அம்மன் காட்சி தருகிறாள் .

மேலக்கோபுர வாயிலுக்கு நிலத்தைத் தோண்டும்போது கண்டெடுத்த அனுமன் சிலை 18 அடி உயரம் உடையது. வெற்றிலை, வட மாலை, வெண்ணெய் சாத்தி இவரை வேண்டி பக்தர்கள் வழிபட்டு வருகின்றனர்.

இக்கோயில் 17 ஆம் நூற்றாண்டை சேர்ந்தது , இக்கோயிலை முன்னர் நம்பூதிரிகள் நிர்வகித்துவந்தனர் அவர் குடும்பத்தை தேக்குமுன் மடம் என்று அழைத்தார்கள் , பின்பு திருமலை நாயக் மற்றும் திருவாங்கூர் மகாராஜ் ஆகியோர்கள் நிர்வகித்தனர் , கி.பி 1875 ஆம் ஆண்டு திருவாங்கூர் மஹாராஜாவால் லாட்டரி ஆரம்பிக்கப்பட்டது அப்போது 40000 ரூபாய் இக்கோயில் மறுசீரமைப்புக்காக லாட்டரி பணம் செலவிடப்பட்டது .

இக்கோயிலில் முதலில் தட்சணாமூர்த்தியை வணங்கி விட்டு கடைசியில் விநாயகரை வணங்குமாறு அமைக்கப்பட்டுள்ளது .

இக்கோயில் மண்டபங்கள் மிக நேர்த்தியாகவும் அழகாகவும் அமைக்கப்பட்டுள்ளது ,கலைநயத்துடன் கூடிய செண்பகராமன் மண்டபம் ,இசைத்தூண்களை கொண்ட குலசேகர மண்டபம் ஆகியவை புகழ்பெற்றவை .

இங்கு வேறு எங்கும் காணமுடியாத கணேசனி என்ற விநாயகரின் பெண் உருவத்தை காணலாம் . இறைவனின் வாகனமான நந்தி தேவர் 13 அடி உயரமும் 21 அடி நீளமும் உடைய இந்தியாவில் உள்ள மிக பெரிய நந்திகளில் ஒன்றாகும் .

ஆஞ்சநேயர் கோயில் : இங்குள்ள ஆஞ்சநேயர் இக்கோயிலின் மேலபிரகாரம் தோண்டும் போது கிடைத்தது ,சுமார் 18 அடி உயரம் கொண்ட நின்ற நிலையில் காட்சி தருகிறார் , இவரை 1930 ஆண்டு நிறுவினார்கள் ,1740 ஆம் ஆண்டு திப்புசுல்த்தான் படையெடுப்பின் போது இவ் சிலையானது சிதலமடைந்தது ,புனரமைத்து பின்பு நிறுவினார்கள் ,மிகவும் பிரசித்துப்பெற்ற ஆஞ்சநேயர் கோயிலாகும் .

முற்காலப் பாண்டியர், பிற்காலச் சோழர், பிற்காலப்பாண்டியர், வேணாட்டார், விஜயநகர நாயக்கர், திருவிதாங்கூர் ஆகிய அரசர்களின் காலத்தில் கட்டுமானம் நடந்திருக்கிறது.

 கல்வெட்டுக்கள்:

இக்கோயிலில் தமிழ் மொழியில் 130 கல்வெட்டுக்களும், வட்டெழுத்து வரிவடிவில் 15 கல்வெட்டுக்களும், கிரந்த எழுத்தில் 5 கல்வெட்டுக்களும் ஆக 150 கல்வெட்டுக்கள் காணப்படுகின்றன. இக்கல்வெட்டுக்களில் பழையது 9-ஆம் நூற்றாண்டு, 17-18 ஆம் நூற்றாண்டு கல்வெட்டுக்கள் அதிகம்.

இங்குள்ள சிற்பங்களில் காரைக்கால் அம்மையார் சிற்பம் முக்கியமானது. அம்மை வயது முதிர்ந்த பெண்ணாக காட்டப்பட்டுள்ளார். இவளது முதிர்ச்சி எலும்பு வடிவில் தெரிகிறது.

சுரதேவர் சிற்பம் அபூர்வமானது. இரண்டு தலைகள், ஆறு கண்கள், மூன்று கைகள், மூன்று கால்கள் என அமைந்தது.

ஆண்டுகளில் 8 தேவதாசிகளால் கட்டப்பட்டது. நம்பூதிரிப்பெண் ஒருத்தியும் கட்டுமானத்திற்கு உதவியிருக்கிறாள்.

இக்கோயிலின் இராஜகோபுரம் விஜயநகரப்பாணி. 7 நிலை, 41 மீட்டர் உயரம். விட்டலர் என்ற விஜயநகரப் படைத்தலைவர் 1544-ல் கோபுர அதிஷ்டானத்தைக் கட்டினார். திருவிதாங்கூர் அரசர் மூலந்திருநாள் கோபுரத்தைக் கட்டினார். கோபுர வேலை 1888-ல் முடிந்தது. கோபுரத்தின் 7 நிலைகளிலும் தாவரச்சாய ஓவியங்கள் உள்ளன.

கோபுரத்தை அடுத்த ஊஞ்சல் மண்டபம் 1584-ல் கட்டப்பட்டது. இங்கு அற்புதமான சிற்பங்கள் உள்ளன. அறம்வளர்த்த அம்மன் திருமணம் இம்மண்டபத்தில் நடக்கும்.

வசந்த மண்டபம், தெற்கு வெளிப்பிரகாரத்தைத் தொட்டு இருப்பது. இங்கு மேற்கூரையில் நவக்கிரகச் சிற்பங்கள் உள்ளன. இம்மண்டபம் 1835-ல் கட்டப்பட்டது. இம்மண்டபத்தின் நடுவில் உள்ள சந்திரகாந்தக்கல்லில் செப்பு பஞ்சலோக படிமங்களை வைத்து குளிரூட்டப்படும் நிகழ்வு முந்தைய காலத்தில் நடந்தது.

அலங்கார மண்டபம். இங்கு இசைத்தூண்கள் உள்ளன. 1758-1798ஆம் ஆண்டுகளில் கட்டப்பட்டடது.

வடக்கு பிரகாரமூலையில் இருப்பது சித்திர சபை. எட்டுதூண்கள் கொண்டது. எட்டிலும் அருமையான சிற்பங்கள் உள்ளன. இம்மண்டபம் ஆரம்பத்தில் மரப்பணியால் ஆனது. 1835-ல் கல்லால் கட்டப்பட்டது.

கிழக்கு வெளிப்பிரகாரத்தில் இருப்பது ஆதித்ய மண்டபம். இங்கு பெருமாளின் கொடிமரமும், தாணுமூர்த்தியின் கொடிமரமும் பலிபீடங்களும் உள்ளன. இம்மண்டபம் 1479-1494 ஆண்டுகளில் கட்டப்பட்டிருக்கலாம். 

செண்பகராமன் மண்டபம் இக்கோயிலுக்குப் பெருமை சேர்ப்பது. இது கைமுக்கு மண்டபம் எனப்படும். 33 மீ நீளம் 26மீ அகலம் உடையது. 36 தூண்கள் கொண்ட இம்மண்டபத்தில் 500-க்கு மேற்பட்ட சிற்பங்கள் உள்ளன. இந்த மண்டப வேலை 1478-ல் முடிந்தது.

இக்கோயிலின் தெப்பக்குளம் 4 ஏக்கர் பரப்புடையது. இது கோயிலின் வடபுறம் உள்ளது. 13 தூண்களும், கோபுரமும் கொண்டது தெப்ப மண்டபம். இந்த குளத்தை முதலில் தோண்டி படிகள் கட்டியவன் வீரமார்த்தாண்டவர்மா குலசேகர பெருமாள். திருக்குளத்தின் படிக்கட்டு 1471-ல் கட்டப்பட்டது. தெப்பமண்டபத்தைக் கட்டியவர் திருமலை நாயக்கரின் தம்பி செவ்வந்தி நாயக்கர். இது 1622 – 1651 ஆம் ஆண்டிற்குள் கட்டப்பட்டிருக்கலாம்.

 விழாக்கள்:

சித்திரை, ஆவணி, மார்கழி, மாசித் திருவிழாக்கள்.சித்திரை விஷு, கார்த்திகை சொக்கப்பனை, ஆடி களப பூஜை, ஆஞ்சநேயர் ஜெயந்தி ஆகியன முக்கிய திருவிழாக்கள். மார்கழி திருவிழா பெரியது. 9-ஆம் நாள் தேரோட்டம். 6-ஆம் நாள் விழா சம்பந்தர் ஞானப்பால் உற்சவம், சித்திரை திருவிழாவில் 10-ஆம் நாள் தெப்பவிழா.

ஓம் நமசிவாய

. *நன்றிகள் திரு தமிழ் பிரியன் ஐயா அவர்கள்  

தமிழகத்தின் ஒரே சரஸ்வதி கோயில்

கலைமகளான சரஸ்வதி தேவிக்கு தமிழ்நாட்டில் உள்ள ஒரே திருத்தலமான #கூத்தனூர் #மஹாசரஸ்வதியம்மன் திருக்கோயில் வரலாறு:கூத்தனூர் சரஸ்வதி கோயில் திருவாரூர் மாவட்டம், நன்னிலம் வட்டத்தில் அமைந்துள்ளது. மயிலாடுதுறை-திருவாரூர் தொடருந்துத் தடத்தில், பூந்தோட்டம் என்ற ஊருக்கு அருகே இக்கோயில் உள்ளது. 

சரஸ்வதி தேவிக்குப் பிரசித்திப் பெற்ற கோயிலாக விளங்குவது கூத்தனூர். திருவாரூர் மாவட்டத்தில் நன்னிலம் வட்டத்தில் அமைந்துள்ள ஊர் பூந்தோட்டம். இந்த ஊரில் கலைகளுக்கு அதிபதியாய் விளங்குகின்ற சரஸ்வதி அம்மன் திருத்தலம் அமைந்துள்ளது. புராண காலத்தில் அம்பாள்புரி என்றும், பூந்தோட்டம் என்றும் அழைக்கப்பட்ட இந்த ஊர், பிற்காலத்தில் இந்த ஊரை இரண்டாம் ராஜராஜ சோழன் தன் அவைப் புலவர் ஒட்டக்கூத்தருக்கு தானமாக வழங்கியதால் கூத்தனூர் என்று பெயர் பெற்று விளங்குகிறது. 

தலச்சிறப்பு : 

கங்கை, யமுனை, சரஸ்வதி கலக்கும் இத்தலம் தட்சிணதிரிவேணிசங்கம் எனப்  பெயர் பெற்றது.  இவ்வூர் இரண்டாம் ராஜராஜ சோழனால் தனது அவைப்புலவரான  ஓட்டக்கூத்தருக்கு தானமாக வழங்கப்பட்டதால் இவ்வூர் கூத்தனூர் என்றாயிற்று.  கும்பகோணம்  சாரங்கபாணி தீட்சிதர் என்பவரின் புதல்வன் வாய் பேசாதிருந்து கூத்தனூர் அம்பிகை அருளால்  விஜயதசமி நன்னாளில் பேச்சுத்திறன் பெற்றதும் இத்தலத்தை திருப்பணி செய்து புருஷேத்தம்பாரதி  எனப் போற்றப்பட்டதும் அண்மை கால வரலாறுகள் கூறுகின்றன.  இத்தலத்தில் அருள்பாலித்து  வரும் அன்னை சரஸ்வதி தேவியை வழிபடுவோர்க்கு கல்வி அறிவு பெற்று மேன்மை அடைவர்.   தமிழ்நாட்டிலேயே ஸ்ரீசரஸ்வதிதேவிக்கு இத்திருக்கோவில் ஒன்று மட்டுமே உள்ளது.

இங்கே சரஸ்வதி தேவி கன்னி சரஸ்வதியாக வீற்றிருந்து, தன்னை தரிசித்து வழிபடும் பக்தர்களுக்குக் கல்விச் செல்வத்தை அள்ளி வழங்கி அருள்புரிகிறாள். சரஸ்வதி தேவி இங்கே கன்னி சரஸ்வதியாக கோயில் கொண்டதன் பின்னணியில் ஒரு வரலாறு சொல்லப்படுகிறது.

தல வரலாறு:

பிரம்மதேவரும், சரஸ்வதி தேவியும் சத்தியலோகத்தில் இருந்தபடி அனைவருக்கும் அருள்பாலித்து வந்தனர். அப்போது சரஸ்வதி தேவிக்கு, ‘எல்லோருக்கும் கல்வியும் ஞானமும் வழங்கும் தானே உயர்ந்தவள்’ என்று ஓர் எண்ணம் ஏற்பட்டது. சரஸ்வதியின் எண்ணம் தெரிந்த பிரம்மதேவர் படைப்புத் தொழில் செய்வதால் தானே பெரியவன் என்று வாதிட்டார். முடிவில் இருவரும் ஒருவரை ஒருவர் சபித்துக்கொண்டனர். அதன்படி அவர்கள் இருவரும் சோழநாட்டில் புண்ணியகீர்த்தி – சோபனை ஆகியோருக்கு முறையே பகுகாந்தன், சிரத்தை என்ற குழந்தைகளாகப் பிறந்தனர். இருவரும் திருமண வயதை அடைந்தனர். பெற்றோர் இவர்களுக்கு ஏற்ற வரனைத் தேடினர். அப்போதுதான் இவர்கள் இருவருக்கும் தாங்கள் யார் என்ற விவரம் தெரிய வந்தது. ஆனால், ஒரு தாயின் குழந்தைகளாகப் பிறந்து, சகோதர முறையில் இருப்பதால், திருமணம் செய்துகொண்டு ஊராரின் கேலிக்கு ஆளாக விரும்பவில்லை. எனவே, இருவரும் சிவபெருமானைப் பணிந்து வணங்கி, தங்களின் இக்கட்டான நிலையைக் கூறினர். இந்த தர்மசங்கடத்தில் இருந்து எப்படி விடுபடுவது என்று ஆலோசனையும் கேட்டனர். ஆனால், ”சகோதர முறையில் உள்ள நீங்கள் திருமணம் செய்துகொள்வது முறையில்லை. சரஸ்வதி மட்டும் இங்கே கன்னியாக இருந்து, வழிபடும் பக்தர்களுக்கு கல்விச் செல்வத்தை வழங்கட்டும் என்று கூறி மறைந்தார். அதன்படி சரஸ்வதி தேவி இங்கே கன்னி சரஸ்வதியாக கோயில் கொண்டுள்ளாள்.

தமிழகத்தில் சரஸ்வதிக்கான தனிக் கோயில் இங்கு மட்டுமே உள்ளது. கருவறையில், சரஸ்வதி தேவி வெண்ணிற ஆடை உடுத்தியவளாக, வெண் தாமரை மலரில் பத்மாசனத்தில் வீற்றிருக்கிறாள். வல மேல்கரத்தில் அட்சமாலை ஏந்தி, வல கீழ்க்கரத்தில் சின்முத்திரை காட்டி, இடது மேல்கரத்தில் அமிர்த கலசம் ஏந்தி, இடது கீழ்க்கரத்தில் புத்தகமும் கொண்டு எழிலார்ந்த திருக்கோலத்தில் காட்சி தருகிறாள்.

புருஷோத்தம பாரதி என்பவருக்கு விஜயதசமியன்று அம்பிகையின் அருள் கிடைத்ததாகச் சொல்லப்படுகிறது. இதன் காரணமாக விஜயதசமி நாளில் பல்வேறு ஊர்களைச் சேர்ந்த பெற்றோர்கள், தங்கள் குழந்தைகளை இந்தக் கோயிலுக்கு அழைத்து வந்து வித்தியாப்பியாசம் செய்த பிறகே பள்ளியில் சேர்ப்பதை வழக்கமாகக் கொண்டுள்ளார்கள்.

பெரும் புலவரான ஒட்டக்கூத்தர் வரகவி பாடும் திறன் வேண்டி கலைமகளை வழிபட்ட தலம் இது. அவர் கூத்தனூருக்கு அருகில் பூந்தோட்டம் அமைத்து, காவிரி நீரால் சரஸ்வதி தேவிக்கு அபிஷேகம் செய்து பூஜித்து வந்தார். அவருடைய பூஜையில் மனம் மகிழ்ந்த சரஸ்வதி தேவி, ஒட்டக்கூத்தருக்குத் தன் வாய் தாம்பூலத்தை வழங்கியதாகவும், அதன் பலனாக ஒட்டக்கூத்தர் வரகவி பாடும் திறம் பெற்று, மூன்று சோழ மன்னர்களின் அரசவைப் புலவராக இருந்ததாகச் சொல்லப்படுகிறது.

கோயில் அமைப்பு:

இக்கோயில் முன்புறம் மூன்று நிலை ராஜகோபுரத்தினைக் கொண்டுள்ளது. முன் மண்டபம் வேலைப்பாடுகளுடன் உள்ளது. அலங்கார மண்டபம் முகப்பில் அம்பாள் சுதை உள்ளது. கர்ப்பகிரக விமானம் கர்ண கூடுகள், அந்த்ராளம் உள்ள மாறுபட்ட விமானமாகும். இரண்டு பிற்காலக் கல்வெட்டுகள் மட்டும் உள்ளன.  இத்தலத்தின் மூலவராக சரஸ்வதி காணப்படுகிறார். வெண்ணிற ஆடையில், வெண் தாமரையில் பத்மாசனத்தில், வலது கீழ் கையில் சின்முத்திரையும், இடக்கையில் புத்தகமும், வலது மேல்கையில் அட்சர மாலையும், இடது மேல்கையில் அமிர்தகலசமும் தாங்கி அமர்ந்திருக்கிறார்.

ஒட்டக்கூத்தர்:

இத்தலத்தில் ஒட்டக்கூத்தர் வழிபட்டு அம்பாள் அருள் பெற்றுள்ளார்.

நம்பிக்கை:

பள்ளிக்குச் சேர்க்கும் முன்பாக குழந்தைகளை அழைத்து வந்து ஆசி பெற்றுச் செல்வதை மக்கள் வழக்கமாகக் கொண்டுள்ளனர். பள்ளி மாணவர்கள் தாம் தேர்ச்சி பெறவேண்டும் என்று பிரார்த்தனை செய்து தம் தேர்வு எண்களைக் குறித்து வைப்பதும் உண்டு. கலைமகள் தமக்கு கல்விச்செல்வத்தை வழங்குவாள் என்ற நம்பிக்கை அவர்களுக்கு உள்ளது.

தமிழகத்தின் ஒரே சரஸ்வதி கோயில்:

தமிழகத்தில் சரஸ்வதிக்கு உள்ள ஒரே கோயில் இக்கோயில். சரஸ்வதிக்கு வேறு எங்கும் தனியாகக் கோயில் இல்லை என்பது குறிப்பிடத்தக்க செய்தியாகும்  இக்கோயிலின் குடமுழுக்கு 1 சூலை 2018 அன்று நடைபெற்றது. 

சரஸ்வதி கோயிலில் வசந்த நவராத்திரி, சாரதா நவராத்திரி சிறப்பாகக் கொண்டாடப்படுகின்றன. சாரதா நவராத்திரி விழா 12 நாள்களும், பின்னர் பத்து நாள்கள் ஊஞ்சல் உற்சவமும் நடைபெறுகின்றன. விழா நாள்களில் சரஸ்வதி தேவி சந்தனக் காப்பு, மஞ்சள் காப்பு, புஷ்ப அலங்காரம் என்று பல்வேறு அலங்காரங்களில் காட்சி தருவதை தரிசிக்கக் கண் கோடி வேண்டும். சரஸ்வதி பூஜையன்று மட்டும் நியமத்துடன் விரதமிருந்து, பக்தர்களே அம்பிகையின் திருவடிகளில் மலர் கொண்டு அர்ச்சிக்கலாம் என்பது குறிப்பிடத்தக்க சிறப்பம்சமாகும்.

விஜயதசமி நாளில் நூற்றுக்கணக்கான கார், வேன் முதலான வாகனங்களுக்கு பூஜை செய்த பிறகு கோயிலை வலம் வருவது பிரமிக்க வைக்கும் காட்சியாகும்.

நவராத்திரி நாள்களைத் தவிர, ஆடி, தை வெள்ளிக்கிழமைகளில் அம்பிகைக்கு சந்தனக் காப்பு, மஞ்சள் காப்பு அலங்காரம் நடைபெறுகின்றது. பௌர்ணமிதோறும் மாலை சிறப்பு அபிஷேக ஆராதனைகள் நடைபெறுகின்றன. சரஸ்வதி தேவியின் அவதார நட்சத்திரமான மூலம் நட்சத்திரம் வரும் நாளிலும் விசேஷமாக அபிஷேக ஆராதனைகள் நடைபெறுகின்றன. விசேஷ நாள்களிலும், சரஸ்வதிக்கு உரிய புதன்கிழமைகளிலும் அம்பிகைக்குத் தேனும் பாலும் அபிஷேகம் செய்தால் கல்வியில் மிகச் சிறந்த முறையில் தேர்ச்சி பெறலாம் என்பது ஐதீகம்.

நமக்கெல்லாம் அருள் புரியவேண்டும் என்பதற்காகவே கன்னியாகுமரியில் அன்னை உமையவள் கன்னியாக இருப்பதைப் போலவே, நமக்கு உயர்கல்வி, நல் ஞானம் ஆகியவற்றை அருள்புரிய வேண்டும் என்று திருவுள்ளம் கொண்டு கூத்தனூரில் கோயில் கொண்டிருக்கும் சரஸ்வதி தேவியைத் தரிசித்து வழிபட்டு அருள் பெறுவோம்.

ஓம் சக்தி  நன்றிகள் திரு தமிழ் பிரியன் ஐயா அவர்கள்.   

சுக்கம்பட்டி உதயதேவரீஸ்வரர்.

சித்தர்கள் நடமாடும் சிவத்தலம் –                                                        சுக்கம்பட்டி உதயதேவரீஸ்வரர்.

சேலத்தில் இருந்து அரூர் செல்லும் வழியில் சுக்கம்பட்டி தேவகிரி மலை இருக்கிறது. சிறிய குன்று போல் அமைந்திருக்கும் இந்த மலை மீது மேற்கு நோக்கி உதயதேவரீஸ்வரி சமேத உதய தேவரீஸ்வரர் அருள்பாலிக்கிறார்.

திருமணிமுத்தாறு பாயத்தொடங்கும் இடத்தில் அமைந்துள்ள முதல் சிவாலயம் என்ற சிறப்பும் இந்த கோயிலுக்கு உண்டு. மூலவரின் மீது தினமும் மாலை வேளையில் சூரிய ஒளி விழுவது இன்றுவரை தொடரும் அபூர்வம். இந்த கோயிலின் தலவரலாறு குறித்த  ஆவணங்கள் கிடைக்கப்பெறவில்லை.

குறிப்பாக, 1131ம் ஆண்டு விக்கிரம சோழன் காலத்தில்  பஞ்சந்தாங்கி திருச்சிற்றம்பல வேலைக்காரர் என்பவரால், கோயிலில்கதவு நிலை  கொடையாக அளிக்க பெற்றதாக கல்வெட்டு தகவல் உள்ளது. 

மேலும், இந்தகோயில் 1818ல் புதுப்பிக்கப்பட்டதற்கான கல்வெட்டு அடையாளங்களும்  காணப்படுகின்றன.ஆரம்ப காலத்தில் இங்கு உதயதேவரீஸ்வரர், விநாயகர், சண்டிகேஸ்வரர், நந்தி சிலைகள் மட்டுமே  இருந்தது. அதே நேரத்தில் ஊருக்குள் மாரியம்மன் திருத்தலம் ஒன்றும் உள்ளது. 

சிவனுக்கு வலதுபுறமாக கிழக்கு நோக்கி உதயதேவரீஸ்வரி அம்மன் சிலையை அமைத்துள்ளார்கள். உதய தேவரீஸ்வரர் ஆலயத்தில் பவுர்ணமி இரவு பூஜை வழிபாடு நடைபெற்று வந்த  நிலையில், பிரதோ‌ஷ வழிபாடு தொடங்க வேண்டும் என்று பக்தர்கள் நினைத்தனர்.  

எனவே சிவனுக்கு வலதுபுறமாக கிழக்கு நோக்கி உதயதேவரீஸ்வரி அம்மன் சிலையை  அமைத்துள்ளனர்.  பிரதோஷம் மற்றும் பவுர்ணமி பூஜைகள், கார்த்திகை தீப திருவிழா சிறப்பாக நடைபெற்று வருகின்றன. குறிப்பாக பவுர்ணமி அன்று நள்ளிரவு 12 மணிக்கு சிறப்பு அபிஷேகம், அலங்கார  ஆராதனைகள் நடைபெறுகிறது.

இங்குதொடர்ச்சியாக நடக்கும் 3 பவுர்ணமிபூஜையில் கலந்து கொண்டால், திருமணத் தடை, நவக்கிரக தோஷம் நீங்கும். குழந்தை பாக்கியம் கிடைக்கும், நினைத்தகாரியம் கைகூடும். 

உதயதேவரீஸ்வரி அம்மன் எதிரில் உள்ள வேப்ப மரத்தில், பிரார்த்தனை செய்து மஞ்சள் கட்டி வந்தால் மூன்று மாதத்தில் நினைத்த காரியங்கள் கை கூடும் என்பது பக்தர்களிடம் தொடரும் நம்பிக்கை.

கோயிலில் பவுர்ணமி இரவு, சிறப்பு பூஜை நடைபெறும்போது விபூதி, மாங்காய் மற்றும் தாழம்பூ வாசம் வீசுவதை பக்தர்கள் இன்றளவும் உணர்ந்து வருகிறார்கள்.

காலாங்கி சித்தர் உள்பட 

3  சித்தர்கள் அந்தக்கோயிலுக்கு சிவனை வழிபட வருவதாகவும், அதன் காரணமாகவே தாழம்பூ, விபூதி, மாங்காய் மணம் அங்கு கமழ்வதாகவும் சிவனடியார்கள் கூறுகின்றனர். 

இதனால் இது, சித்தர்கள் நடமாடும் சிவத்தலமாகவும் போற்றப்படுகிறது.500 அடி உயரத்தில் அமைந்துள்ள இந்த தலத்திற்கு, குன்றின் மேல் பாதி தூரம் வரை படிக்கட்டுகள் அமைக்கப்பட்டுள்ளன. மீதி தூரத்திற்கு மண் பாதையில் தான் செல்ல  வேண்டும்.

கோயில் முன்பு பக்தர்கள் அமர மேற்கூரை இருக்கிறது. சிறிய ஆலயமாக இருந்தாலும் சித்தர்கள் வாசம் செய்யும் இந்த திருத்தலம், பக்தர்களின் வேண்டுதலை நிறைவேற்றும் பெருந்தலமாகவே உள்ளது. 

யானைமலை யோக நரசிம்மர்

நல்லதை நடத்தித் தரும் யானைமலை யோக நரசிம்மர் 

மதுரை அருகே உள்ள யானை மலை ஒத்தக்கடை என்ற இடத்தில் உள்ளது யோக நரசிம்மர் ஆலயம். 

மிகவும் பழமை வாய்ந்த இந்த ஆலயத்தில் மூலவராக யோக நரசிம்மர் வீற்றிருந்து அருள்பாலிக்கிறார். தாயார் பெயர் நரசிங்கவல்லி என்பதாகும். ஆலய தீர்த்தம் சக்கர தீர்த்தமாகும். 

இது ஒரு குடைவறைக் கோவிலாகும். நரசிம்மர் வீற்றிருக்கும் ஆலயங்களிலேயே, மிகப்பெரிய உருவத்தை கொண்ட ஆலயம் இது என்பது தனிச் சிறப்பாகும்.

தல வரலாறு:

உரோமச முனிவர், தனக்கு புத்திர பாக்கியம் வேண்டி, இந்த யானை மலை தலத்திற்கு வந்து சக்கர தீர்த்தத்தில் நீராடி யாகத்தை தொடங்கினார். மேலும் நரசிம்மரை, அவரது நரசிம்ம அவதார கோலத்திலேயே தரிசிக்கவும் விரும்பினார். இறைவனும் உரோமச முனிவரின் விருப்பப்படியே, உக்கிர நரசிம்மராக தோன்றி காட்சி தந்தார். ஆனால் நரசிம்மரின் உக்கிர கோல வெப்பத்தால் உலகமே தகித்தது. 

இதனை தாங்கிட முடியாமல், தேவர்களும், முனிவர்களும் பிரகலாதனிடம் சென்று முறையிட்டனர். பிரகலாதனும் இத்தலத்திற்கு வந்தார். 

ஆனால் நரசிம்மரின் உக்கிரம் குறைந்ததே தவிர, வெப்பம் முற்றிலும் நீங்கவில்லை.

இதையடுத்து அன்னை மகாலட்சுமியிடம் அனைவரும் முறையிட்டனர். மகாலட்சுமியும் இத்தலத்திற்கு வந்தார். 

அதன்பிறகே நரசிம்மரின் உக்கிரம் முழுமையாக மாறி தணிந்தது. மேலும் அன்னை மகாலட்சுமியை ஆலிங்கனம் செய்தபடி, யோக நரசிம்மராக, கேட்டதை வழங்கும் வள்ளலாக இத்தலத்தில் நரசிம்மர் அருள்புரிகிறார்.

இத்தலத்தில் இருக்கும் யோக நரசிம்மர், தன் மார்பினில் மகாலட்சுமியை தாங்கியபடி மேற்கு திசை நோக்கி அருள்பாலிக்கிறார். 

இந்த ஆலயத்தில் கொடி மரம் இல்லை.  பொதுவாக கொடி மரம் என்பது, கருவறைக்கு மேலுள்ள விமானத்தின் நீளம், அகல அளவைப் பொறுத்ததே. ஆனால் இத்தலத்தில் கருவறைக்கு மேல், யானை மலை மிகவும் உயர்ந்து காணப்படுவதால் கொடி மரம் வைக்கப்படவில்லை என்று கூறப்படுகிறது.

நரசிம்மராக அவதாரம் எடுத்தது, தேய்பிறை சதுர்த்தி காலத்தில் தான். எனவே அந்த நேரத்தில் இந்த யோக நரசிம்மரை வழிபட்டால், கல்வி சிறக்கும். வியாபாரம் விருத்தியாகும். எதிரி பயம் விலகும். மரண பயம் அகலும். அதே போல் நரசிங்கவல்லி தாயாரை வணங்கினால் திருமணத் தடை நீங்கும். கோபம் குறைந்து அமைதியான வழியில் செல்ல வழி ஏற்படும் என்பது அனுபவ உண்மையாகும்.

இந்த ஆலயத்தின் அருகே உள்ள தீர்த்தத்தில் மாசி மாத பவுர்ணமி தினத்தன்று கஜேந்திர மோட்ச விழா சிறப்பாக நடத்தப்படுகிறது. 

திருவண்ணாமலையைப் போலவே இங்கும் ஒவ்வொரு பவுர்ணமி தோறும் கிரிவலம் நடைபெறுகிறது. 

இத்தலத்தில் சிவபெருமானுக்கு நடக்கிற பிரதோஷம் போல, நரசிம்மருக்கு பிரதோஷ பூஜை நடப்பது மிகவும் சிறப்பானதாகும். 

அமைவிடம் :

மதுரையில் இருந்து சென்னை செல்லும் தேசிய நெடுஞ்சாலையில், மதுரை மாட்டுத்தாவணி பஸ் நிலையத்தில் இருந்து சுமார் 8 கிலோமீட்டர் தூரத்தில் அமைந்துள்ளது யானை மலை ஒத்தக்கடை. இங்கிருந்து மினி பஸ்களில் 2 கிலோமீட்டர் மேற்கே சென்றால் கோவிலை அடையலாம். 

புல்  சாப்பிட்ட  நந்தி

கஞ்சனூர் அக்னீஸ்வரர்:புல்  சாப்பிட்ட  நந்தி

கல் நந்தி புல் சாப்பிட்டு மெய்ப்பிக்கச் செய்ய வேண்டும் என்று ஹரதத்தர் மனமுருக வேண்டினார்.கஞ்சனூரில் தேவசர்மா என்ற அந்தணன் இருந்தான். அவன் ஒரு முறை வைக்கோல் கட்டுகளை, அறியாமலும்.. தெரியாமலும் ஒரு பசுங்கன்றின் மீது போட்டு விட, அந்தக் கன்று துடிதுடித்து இறந்து போனது. அந்தக் கன்று, சிறந்த பக்திமானான ஹரதத்தர் என்பவருக்குச் சொந்தமானது.பசுங்கன்றைக் கொன்றதால், அவனை மகாபாவி என்று பலரும் ஒதுக்கினார்கள். இந்த நிலையில் நடந்த விபரீதத்தை எடுத்துக் கூறுவதற்காக, பசுங்கன்றின் உரிமையாளரான ஹரதத்தரின் வீட்டிற்குச் சென்றான், தேவசர்மா.

 அங்கு வீட்டுக்குள் நுழைந்தபோது, வாசல்படி தலையில் இடித்து ‘சிவ.. சிவா’ என்று கத்தினான்.குரல் கேட்டு வெளியே வந்த ஹரதத்தர், தேவசர்மா பற்றியும், அவன் வந்த நோக்கம் பற்றியும் அறிந்து கொண்டார். பின்னர், ‘நீ சிவ என்று சொன்னதுமே, பசுவைக் கொன்ற உன்னுடைய பாவம் நீங்கிவிட்டது.இரண்டாவதாக சிவா என்று கூறியதற்காக, உனக்கு கயிலாய பதவியும் கிடைக்கப் போகிறது’ என்று தேவசர்மாவுக்கு ஆறுதல் கூறினார்.ஆனாலும் கூட ஊர்மக்கள் பலரும் தேவசர்மாவை மனதார மன்னிக்கவில்லை. ஊரைவிட்டு விலக்கியே வைத்திருந்தார்கள்.ஒரு நாள் ஹரதத்தர், கஞ்சனூரில் உள்ள அந்தணர்கள் அனைவரையும், அங்குள்ள ஈசன் எழுதருளியுள்ள அக்னீஸ்வரர் ஆலயத்திற்கு வருமாறு அழைப்பு விடுத்தார். அதன்படியே ஊர் மக்கள் அனைவரும் ஆலயத்தில் கூடியிருந்தனர்.

அப்போது ஹரதத்தர், தேவசர்மாவிடம் ஒரு புல் கட்டைக் கொடுத்து, ‘நீ சிவ.. சிவா என்று சொன்னதுமே உன்னுடைய பசுவைக் கொன்ற பாவம் நீங்கிவிட்டதாக நான் கூறினேன். ஆனால் அதை ஊர் மக்கள் யாரும் நம்பவில்லை.எனவே நீ இங்குள்ள கல் நந்திக்கு இந்தப் புல்லைக் கொடு. அது அதை சாப்பிட்டால் உன்னுடைய பாவம் நீங்கிவிட்டதாக இங்கிருப்பவர்கள் உணர்ந்து கொள்வார்கள்’ என்றார்.அதைக் கேட்டு கூடியிருந்த மக்கள் அனைவரும் எள்ளி நகையாடினர். ‘கல் நந்தி எப்படி புல் சாப்பிடும்’ என்பதால் வந்த நகைப்பு அது.

ஆனால் ஹரதத்தரோ இறைவன் மீதான நம்பிக்கையில், ‘இறைவா! உன்னுடைய நாமத்தை ஒரு முறை சொன்னாலே பசுங்கன்றை கொன்ற பாவம் நீங்கிவிடும் என்று நான் சொன்னது உண்மையானால், கல் நந்தியை புல் சாப்பிட்டு மெய்ப்பிக்கச் செய்ய வேண்டும்’ என்று மனமுருக வேண்டினார்.என்ன ஆச்சரியம்.. தேவசர்மா கொடுத்த புல்லை அந்த கல் நந்தி சாப்பிட்டது. அங்கிருந்த அனைவரும் சிவ நாமத்தின் உயர்வையும், பக்திக்கு கிடைக்கும் பலனையும் கண்டு இறைவனை மனதார வழிபட்டனர்.இந்த கல் நந்தி, கஞ்சனூர் அக்னீஸ்வரர் ஆலயத்தில் இருக்கிறது. திருவாரூர்- கும்பகோணம் சாலையில் 45 கிலோமீட்டர் தூரத்தில் உள்ளது கஞ்சனூர்.

மூங்கிலணை காமாட்சி அம்மன்

தல வரலாறு

முன்பொரு காலத்தில்,காஞ்சனா எனும் காட்டுப் பகுதியை,சூலபாணி எனும் அசுர மன்னன் வங்கிசபுரி எனும் நகரைத் தலைநகராகக் கொண்டு ஆண்டான்.இவன் சிவபெருமானை நோக்கிக் கடுமையான தவம் புரிந்து பல அரிய வரங்களைப் பெற்றிருந்தான்.அதில் தனக்குத் தன்னைக்காட்டிலும் அதிக வலிமையுடன்,தான் பெற்ற அரிய சக்திகளுடன் ஆண் மகன் ஒருவன் பிறக்க வேண்டும் என்பதும் ஒன்று.

இந்த தவத்தின் பலனால் அவனுக்கு வலிமையான ஆண்மகன் பிறந்தான்.அவனுக்கு வச்சிரதந்தன் எனும் பெயரிட்டு வளர்த்து,அவனை அப்பகுதியின் அரசனாக்கினான்.அவனுக்கு மாங்குசானன் என்பவன் அமைச்சராகவும்,துட்டபுத்தி என்பவன் தளபதியாகவும் இருந்தனர்.இவர்களிருவரின் ஆலோசனைப்படி காட்டுப் பகுதியிலிருந்த தவசிரேஷ்டர்களையும்,வேத விற்பன்னர்களையும் கொடுமைப்படுத்தத் தொடங்கினான்.பிறப்பிலேயே பல்வேறு சக்திகளைப் பெற்றிருந்ததால் அவனை யாராலும் எதிர்க்க முடியவில்லை.பாதிக்கப்பட்டவர்கள் அவனுடைய தொல்லைகள் பற்றி பிரம்மனிடம் சென்று முறையிட்டனர்.அவரும் வச்சிரதந்தனை அழிக்க தேவேந்திரனை அனுப்பி வைத்தார்.

தேவேந்திரன் வச்சிரதந்தனின் தளபதியான துட்டபுத்தியின் தாக்குதலுக்கு ஈடுகொடுக்க முடியாமல் தனது படையையும் இழந்து போர்க்களத்திலிருந்து ஓடிவிட்டான்.இப்படி ஓடிய தேவேந்திரன் வச்சிரதந்தனை பராசக்தியால் தான் அழிக்க முடியும் என்று கருதி பிற தேவர்களுடன் #பராசக்தி காமாட்சியம்மனாக எழுந்தருளியுள்ள காஞ்சிபுரம் சென்று அன்னையிடம் வேண்டினர்.அவர்களின் வேண்டுகோளை ஏற்ற #காமாட்சியம்மன் அவனை அழிக்கப் புறப்பட்டார்.வங்கிசபுரி வரும் வழியில் பன்றி மலை என்ற வராக மலையில் இறங்கி துர்க்கையை வச்சிரதந்தனுடன் போரிட அனுப்பி வைத்தார்.துர்க்கை அங்கிருந்து புறப்பட்டு வங்கிசபுரி வந்து வச்சிரதந்தனுடன் போர் புரிந்தார்.

அவனுடைய தலையைத் துண்டித்தார்.மீண்டெழுந்து சிங்கத்தலையுடன் நின்றான்.அதையும் துண்டித்தார்.பின்னர் புலி,கரடி,காட்டெருமை என ஒவ்வொரு தலையுடன் தோன்ற அனைத்தையும் துண்டித்தார் துர்க்கை.இவனை ஒழிக்க காமாட்சியம்மனாலேயே முடியும் என்ற நோக்குடன் துர்க்கை அங்கிருந்து திரும்பினார்.துர்க்கை தோல்வியுடன் திரும்பியது கண்டு காமாட்சியம்மன் கோபத்துடன் துர்க்கா தேவியையும் அழைத்துக் கொண்டு அங்கிருந்து வங்கிசபுரி வந்தார்.வச்சிரதந்தன் ஏவிய ஆயுதங்கள் காமாட்சியம்மனை மூன்று முறை வலம் வந்து அவனிடமே திரும்பிச் சென்றது.வச்சிரதந்தனும் அந்த அம்மனை வணங்கினான்.பின்னர் அம்மனுடன் போரிடத் தொடங்கினான்.

துர்க்கையுடன் போரிட்டது போல் பல்வேறு தலைகளுக்கு மாறினான்.காமாட்சியம்மன் துர்க்கையிடம் வச்சிரதந்தன் தலை துண்டிக்கப்பட்டு தரையில் விழுந்தவுடன் அதைக் காலால் நசுக்கி அழித்து விடும்படி கூறி வச்சிரதந்தனின் தலையைத் துண்டித்தார்.துர்க்கையும் அந்தத் தலையைக் காலால் நசுக்கி அழித்தார்.அசுரன் மறுதலை எடுக்க முடியாமல் அழிந்தான்.தேவர்கள் பூமாரி பொழிந்தனர்.

அசுரனது தலையை மிதித்த இடம் தலையாறு எனவும்,மூளை சிதறிப் போய் விழுந்த இடம் மூளையாறு எனவும்,குலைகாய் ஈரல் விழுந்த இடம் குலையூத்து எனவும்உடல் குறுக்காக விழுந்த இடம் குறுக்குமலை எனவும் பெயர் பெற்றன.இன்றும் இந்தப் பகுதியில் இந்தப் பெயர்கள் வழக்கத்திலுள்ளன.

 வங்கிசபுரிக்கு அருகில் வேகவதி என்ற ஆறு ஓடிக் கொண்டிருந்தது.இந்த ஆறு மாணிக்கமலைத் தொடரிலிருக்கும் தலையாறு எனுமிடத்தில் மூங்கில் காடுகளுக்கிடையே பாய்கிறது.அசுரனைக் கொன்ற அம்மன் யௌவன வடிவம் கொண்டு இந்நதி அருகில் தவமிருந்தாள்.அசுரனைக் கொன்ற பாவம் அம்மனுக்கு நீங்குவதற்காக சப்த கன்னியர்கள்,தெய்வப் பெண்கள்,துர்க்கை அனைவரும் சேர்ந்து ஆயிரத்தெட்டு தங்கக் குடங்களில் நீரெடுத்து வாசனைத் திரவியங்களுடன் மஞ்சளும் கலந்து அபிசேகம் செய்தனர்.கன்னித் தெய்வமாய் பொலிவுறும் காமாட்சியம்மனுக்கு அபிஷேகம் செய்த மஞ்சள் நீர் ஆற்றில் கலந்ததால் வேகவதி ஆறாக இருந்த ஆறு #மஞ்சளாறு எனப் பெயர் மாற்றமடைந்தது.அம்மன் தலையாற்றின் மூங்கில் காடுகளில் தவமிருந்த இடத்தில் சிறிய கோவில் கட்டப்பட்டுள்ளது.இது“அம்மா மச்சு”என்று அழைக்கப்படுகிறது.

சிறப்புகள்

கோவிலில் அடைத்த கதவிற்கு முன்பாகவே பூஜை செய்யப்படுகிறது.கோவிலின் குச்சுவீடு கலசம் (கர்ப்பகிருக கலசம்) தரிசனம் சிறப்பான ஒன்றாக உள்ளது.அம்மனுக்கு நைவேத்தியம் செய்யப்படும் தேங்காய் உடைக்கப்படுவதில்லை.பழம் உரிக்கப்படுவதில்லை.அன்ன நைவேத்தியம் செய்யப்படுவதில்லை.கோவிலில் நெய் விளக்கு தீபம் மட்டுமே ஏற்றப்படுகிறது.விளக்குக்காகப் பக்தர்களிடம் காணிக்கையாகப் பெறப்படும் நெய் இங்குள்ள மண்பானைகளில் ஊற்றி வைக்கப்படுகின்றன.இந்த நெய்யிற்கு எறும்பு,ஈ,வண்டு என்று எதுவும் வருவதுமில்லை, மொய்ப்பதும் இல்லை.

திருவிழாக் காலத்தில் கோவிலில் அம்மனுக்குக் காணிக்கையாகச் செலுத்தப்படும் நெய் சேகரிப்புக்காக சுமார் ஐம்பது மண்பானைகள் வைக்கப்படுகின்றன.இவையனைத்தும் எட்டு நாட்கள் திருவிழாவில் நிரம்பி விடுகின்றன.தேவதானப்பட்டியைச் சுற்றிலுமுள்ள சில கோவில்களுக்கு இங்கிருந்து நெய் மற்றும் நைவேத்தியப் பொருட்கள் தொடர்ந்து அளிக்கப்பட்டு வருகின்றன.

வருடத்திற்கு ஒருமுறை கோவிலின் குச்சு வீடு கலசத்திற்குக் கூரை வேயப்படும் போது ராஜகம்பளம் சாதியினர் தங்கள் கண்களைத் துணியால் கட்டிக் கொண்டு தான் காமாட்சிப் புல்லால் கூரை வேய்கின்றனர். காஞ்சிபுரம் காமாட்சியம்மன் கோவில் போன்றே இங்கும் பூஜை மண்டபத்தின் முன்பு கௌளி சின்னம் (பல்லியின் சின்னம்) பொறிக்கப்பட்டுள்ளது.இங்கும் கௌளி குறி கேட்டல் முக்கியமான ஒன்றாக உள்ளது.ராஜகம்பளம் சாதியைச் சேர்ந்தவர்கள் இங்கு பரம்பரை அறங்காவலர்களாக சுழற்சி முறையில் இருந்து வருகின்றனர்.மூங்கில் அணையிட்டு நிறுத்தியதால் இந்த அம்மன் மூங்கிலணைக் #காமாட்சி என்று அழைக்கப்படுகிறார்.

கோவில் கதவிற்குப் பூஜை

கோவில் பூஜை செய்யும் பொறுப்பு மலை மேல் குடியிருக்கும் மன்னாடியர்கள் வசம் ஒப்படைக்கப்பட்டது.அவர்களும் பூஜைப் பணிகளைச் செய்து வந்தனர்.இந்நிலையில் மன்னாடியருக்கும், ஜமீந்தாரருக்கும் அவர்களது நிலங்களுக்குத் தண்ணீர் பாய்ச்சுவதில் கருத்து வேறுபாடு ஏற்பட்டது.இந்தக் கருத்து வேறுபாட்டில் கோபம் கொண்ட மன்னாடியார் கோவில் கதவைப் பூட்டியதுடன்“நான் அடைத்த கதவு என்றும் திறக்கக் கூடாது”என்று சொல்லிவிட்டுச் சென்றார்.அன்றிலிருந்து இன்று வரை பூட்டிய கதவு திறக்கப்படுவதில்லை.மேலும்,அடைத்த கதவிற்கு முன்பாகத் தான் பூஜை செய்யப்படுகிறது.தற்போது அந்த அடைத்த கதவின் முன்பாக நாக பீடம் அமைக்கப்பட்டு காமாட்சியம்மனுக்கு வழிபாடு செய்யப்படுகிறது.

குக்கி சுப்ரமண்யா

ஐந்து தலை நாகம் குடைபிடிக்க முருகப்பெருமான் அருள்பாலிக்கும்புகழ்பெற்ற கர்நாடக மாநிலத்தில் அமைந்துள்ள  குக்கி சுப்ரமண்யா

ஸ்ரீசுப்ரமணியசுவாமி திருக்கோயில் வரலாறு:

இந்தியாவில், கர்நாடக மாநிலத்தின், மங்களூர் அருகே உள்ள தட்சின கர்நாடக மாவட்டத்தில் உள்ள கடபா தாலுக்கின் (முன்பு சுல்லியா தாலுக்காவில்) குக்கி சுப்ரமண்ய எனும் கிராமத்தில் அமைந்துள்ளது. இங்குள்ள மக்கள் இக்கோயிலை குக்கி சுப்பிரமணியசுவாமி கோயில் என்று அழைக்கின்றனர்.

 பெரிய மலை  உள்ளது. அதற்குக் குமாரகிரி என்பது பெயராகும். அதிலிருந்து குமார தாரை என்று சிற்றாறு தோன்றி ஓடுகின்றது. முருகப் பெருமான் தாரகாசுரனைக்  கொன்றபின் தமது வேலைக் கழுவித் தூய்மைப்படுத்துவதற்காக இந்த ஆற்றைத் தோற்றுவித்ததாகக் கூறுகின்றனர். இக்கோயிலுக்கு வடக்கில் ஆதி  சுப்பிரமணியா என்ற திருத்தலம் உள்ளது. இங்கு பெரிய பாம்புப் புற்று உள்ளது. அதன்மீது பெரிய அளவில் தங்கமுலாம் பூசிய பாம்பும் ஏராளமான  சிறிய பாம்புகளில் வடிவங்களும் வைத்து வணங்கப்படுகின்றன. இக்கோயிலின் மூலவரான முருகனை அனைத்து நாகர்கள் தங்கள் குலதெய்வமாக வழிபடுகின்றனர்.புராணக்கதைப்படி, கருடனுக்கு அஞ்சிய நாகர்களின் (பாம்புகளின்) குலத்திற்கு தலைவியான வாசுகி உட்பட அனைத்து நாகர்கள் இவ்விடத்தில் குடிகொண்டுள்ள சுப்பிரமணியசுவாமியைப் புகலிடமாகக் கொண்டுள்ளனர்.இங்கு பூஜைகளும் தினசரி சடங்குகளும் சிவல்லி மத்வ பிராமணர்களால் செய்யப்படுகின்றன.

குக்கி சுப்ரமணியசுவாமி கோயில், கர்நாடக மாநிலத்தில் அமைந்துள்ள மேற்கு தொடர்ச்சி மலையில் உள்ள அடர்ந்த காட்டில் குமார மலையில் அழகான குக்கி சுப்ரமண்யா எனும் கிராமத்தில் அமைந்துள்ளது. இந்த குமார மலையைப் பாதுகாக்கும் விதமாக இதன் அருகே ஆறு தலை பாம்பு வடிவத்தில், சேஷமலை அமைந்துள்ளது. மூலவர்: சுப்ரமணியசுவாமிதீர்த்தம்:குமார தாராஊர்: குக்கி சுப்ரமண்யா மாவட்டம்: தட்சின கன்னடாமாநிலம்: கர்நாடகம்

கருவறையில் கீழே உடலைச் சுருட்டிக் கொண்டு விரிந்த படத்துடன் கூடிய பாம்பும், அதன்மீது அதே போன்று ஒரு பாம்பும், அதன் மீது மற்றோர்  பாம்பும் என மூன்று பாம்புகள் ஒன்றன் மீது ஒன்றாக அடுக்காக (தூண் வடிவில் ) அமைந்துள்ளன. உச்சியில் உள்ள பாம்பின் படத்தின் மையத்தில்  ஆறுமுகப் பெருமான் மயில் வாகனத்தில் எழுந்தருளியுள்ளார். இந்த அமைப்பு முழுவதற்கும் வெள்ளிக் கவசம் அணிவிக்கப் பெற்றுள்ளது. அருகில்  உற்சவராகச் சில பாம்புகளின் உருவங்களும் உள்ளன. பாம்புகளோடு அறுமுகப்பெருமான் அழகுடன் கொலுவிருக்கின்றான். கருவறைக்கு நேர் எதிரில்  கருட கம்பம் உள்ளது. 

இதில் கருடன் வீற்றிருந்து பாம்பு அரசர்களையும், சுப்பிரமணியரையும் போற்றி வழிபாடு கொண்டிருப்பதாகக்  கூறப்படுகிறது தூணையும் வெள்ளிக் கவச மிட்டு அழகுபடுத்தியுள்ளனர்.

புராண வரலாறு:

ஒரு சமயம் இந்த உலகத்தை உற்பத்தி செய்த காஸ்யபனின் மனைவியரான கத்ரு, வினதை என்பவர்கள் ஒரு தோட்டத்தில் விளையாடிக்  கொண்டிருந்தனர். அவர்கள் விளையாடிக் கொண்டிருந்த தோட்டத்தில் வெண்மையான ஒரு குதிரை அங்கு மேய்ந்து கொண்டிருந்தது. அதன்  பின்பக்கமும், வாலும் ஒரு புதரில் மறைந்திருந்தது. அப்போது வினதை, கத்ருவிடம் ,‘‘அந்தக் குதிரையின் வால் எந்த நிறம்’’ என்று கேட்டாள். ‘‘அது  வெள்ளை நிறத்தையுடைய குதிரை. எனவே, அதன் வாலும் வெண்மையாக இருக்கும்’’ என்று பதில் உரைத்தாள். அதற்கு கத்ரு, வினதையே அதன்  வால் கரு நிறத்தை உடையது என்றாள். இப்படி இருவரும் தத்தம் கருத்தை வலியுறுத்திப் பேசிக் கொண்டே இருந்தனர். இறுதியில் அது வாய்ச்  சண்டையாக உருவெடுத்தது. முடிவில் கத்ரு, வினதையிடம், ‘‘அதன் வால் வெண்மையாக இருந்தால் நான் உனக்கு அடிமை, கருப்பாக இருந்தால் நீ  எனக்கு அடிமை இதற்குச் சம்மதமா ?’’ என்றாள் . வினதையும் அதற்கு ஒப்புக் கொண்டாள். கத்ரு உடனே ரகசியமாகத் தனது மக்களாகிய பாம்புகளை  அழைத்து அந்தக் குதிரையின் வாலைக் கடித்துத் தமது விஷத்தால் கருப்பாக்கும்படி ஆணையிட்டாள்.

பெரிய பாம்புகள் அதற்கு உடன்படவில்லை. பலமுறை சொல்லியும் தனது பேச்சைக் கேளாததால் கோபம் கொண்ட கத்ரு அந்தப் பாம்புகளைத் தனது  குழந்தைகள் என்றும் பாராமல், ‘‘நீங்கள் ஜனமேஜயன் செய்யும் சர்ப்ப யாகத்தில் விழுந்து மொத்தமாக அழியுங்கள்’’ என்று சாபமிட்டாள். பேசாமல்  அஞ்சி நின்ற இளைய நாகங்களைப் பார்த்து ‘‘நீங்கள் பறவைகளுக்கு இரையாகி மாளுங்கள்,’’ என்றாள். தாயின் சாபத்தால் வருந்திய பாம்புகள் தமது  குல முதல்வர்களான வாசுகி, அனந்தன், ஆதி சேடன் ஆகிய மூவரையும் சரணடைந்து தங்களைக் காக்குமாறு வேண்டின. அவை அந்தப் பாம்புகளை  அழைத்துக் கொண்டு கயிலாசத்திற்குச் சென்று சிவபெருமானைச் சரணடைந்து தம்மைக் காக்குமாறு விண்ணப்பித்தன.

சிவபெருமான் அவற்றைப் பூவுலகில் குமாரகிரி என்று சொல்லப்படும் இந்த மலையில் உள்ள ஆற்றங்கரையில் தவம் இருக்கும்படியும், உங்களுக்கு  இத்தலத்தில் யாராலும் எவ்விதத்திலும் எந்தத் துன்பமும் நேராது என்றும் அபயம் தந்து அருட் பாலித்தார். தாயின் சாபத்திற்குப் பயந்த சில பாம்புகள்  குதிரையின் வாலைப் பற்றி அதைக் கடித்துக் கருமையாக்கின. பின்னர், கத்ரு வினதையை அழைத்துக் கொண்டு, குதிரையின் அருகில் சென்று  அதைக் காட்டினாள். அதன் வால் கருமையாக இருக்கவே வினதை தன் சொல்படியே அவளுக்கு அடிமையானாள். அடிமையான வினதை,  எஜமானியான கத்ருவை அவள் செல்லும் இடமெலாம் அவளைச் சுமந்துகொண்டு செல்லவேண்டியதாயிற்று. இப்படியே பல காலங்கள் சென்றன.  காலப்போக்கில் வினதை இரண்டு முட்டைகளைப் பெற்றெடுத்தாள்.

500 ஆண்டுகளாகியும் அந்த முட்டையிலிருந்து எதுவும் வெளிவராததால் அதனை அவள் உடைத்துப் பார்த்தாள். அதில் கால் மட்டும் வளராத  நிலையில் ஒரு மகன் இருந்தான். அவன் அவளைத் தொழுது, ‘‘தாயே, என் கால்கள் வளரும் முன்பே என்னை பிரசவிக்கச் செய்து விட்டாய்.  இன்னொரு முட்டையை உடைக்காதே அதிலிருந்து வலிய மகன் பிறப்பான்’’ என்று சொல்லிவிட்டுச் சூரியனை நோக்கித் தவம் செய்யத்  தொடங்கினான். அவனுடைய தவத்தால் மகிழ்ந்த சூரியன் அவனுக்கு அருணன் என்று பெயரிட்டு அவனைத் தனது தேரோட்டியாக ஏற்றுக்  கொண்டான். அவன் சொற்படி மேலும் 500 ஆண்டுகள் சென்றன, பிறகு முட்டையை உடைத்துக் கொண்டு கருடன் வெளிவந்தான். 

அவன் நடந்ததை  அறிந்து, தனது ஆற்றலால் தாயின் துயரத்தை நீக்கி, அவளை விடுதலை செய்தான் என்று புராணங்கள் விரிவாகக் கூறுகின்றன. பின்னாளில் பல  பாம்புகள் தாயின் சாபத்தால் சர்ப்ப யாகத்தில் வந்து வீழ்ந்து அழிந்தன. பறவைகள் தின்றதால் பல பாம்புகள் அழிந்தன.

ஆனால், இந்த குமாரகிரியில் அடைக்கலம் புகுந்த பாம்புகள் மட்டும் அழிவில்லாமல் இருந்தன. அவை வாசுகி, அனந்தன், ஆதிசேடன் முதலிய  மூவரின் தலைமையில் சிவபூசை செய்து கொண்டு மகிழ்வுடன் இருந்தன. பின்னர் ஒருநாள் முருகனே பெரிய பாம்பாகத் தோன்றி அவற்றிற்கு  அருட்பாலித்தார். அந்த சுப்ரமணியனான பெரும் பாம்பை வழிபட்டதால் அவை தாயின் சாபத்திலிருந்து விடுதலை அடைந்தன. அதன் பிறகு பாம்புகள்  பூமியில் செழித்து வளர்ந்தன என்று வரலாறுகள் கூறுகின்றன.

முருகன் நெடுங்காலம் பாம்பு வடிவமாக இருந்து இங்கு ஒரு குகையில்  எழுந்தருளியிருந்து சிவபெருமானை வழிபட்டுத் தாரகனைக் கொன்ற பாவத்தைத் தீர்த்துக் கொண்டார் என்பர். அவர் வழிபட்ட சிவலிங்கம் குகையில்  இருந்ததால் அது குக்குலிங்கம் என்று அழைக்கப்பட்டதுடன், அதைச் சுற்றியுள்ள இத்தலமும் குக்கே லிங்கம் என்று பெயர் பெற்றது. பின்னாளில் இது  முருகன் பெயரால் குக்ரீகு சுப்ரமண்யா என்ற பெயரில் வழங்கி வருகின்றது என்பர்.   மேலும், கர்நாடகா மாநிலத்தில் காட்டி சுப்ரமண்யா என்றொரு  முருகத் தலமும் உள்ளது.

இந்தக்கோயில் சிவபெருமானின் இரண்டாவது மகனான முருகக் கடவுளும் பாம்பு ராஜாவான வாசுகியும் உறையும் ஸ்தலமாக பிரசித்தி பெற்றுள்ளது.  வெளிமுற்றம் மற்றும் உள்முற்றம் வழியாக பக்தர்கள் இந்தக்கோயிலின் கருவறைக்குச் செல்லலாம். ஒரு பீடத்தின் மீது சுப்ரமண்யர் சிலையும்  அருகில் வாசுகிப்பாம்பின் சிலையும் காணப்படுகின்றன. மற்றொரு ஹிந்து புராண அவதாரமான ஆதிசேஷன் சிலையையும் கருவறையில் பக்தர்கள்  பார்க்கலாம்.  கருவறைக்கும் முன்வாசல் அமைப்புக்கும் இடையில் வெள்ளி முலாம் பூசப்பட்ட கருடத்தூணை பக்தர்கள் காணலாம்.பக்தர்கள்  கோயிலுக்குச் செல்வதற்கு முன், கோயிலுக்கு அருகில் ஓடும் குமாரதாரா எனும் நதியில் புனித நீராடிவிட்டு குக்கி சுப்பிரமணியசுவாமி கோயிலுக்குச்  செல்ல வேண்டும். மேலும் கோயிலின் முன் மண்டபத்திற்கும் கர்ப்பகிரகத்திற்கும் நடுவே உள்ள கருடனின் வெள்ளித்தூணை வலம் வந்து,  வெள்ளித்தூணில் பொதிந்துள்ள கருடனை வழிபட்டால் சர்ப்பங்கள் வெளிவிடும் விஷத்தை எதிர்கொள்ள முடியும் என்பது பக்தர்களின் நம்பிக்கை.

துன்புற்ற நாகமும், சுப்பிரமணியரும்:

வினதையின் மகனான கருடன், நாகங்களுக்கு துன்பங்களை விளைவித்தான். பாதிக்கப்பட்ட நாகங்கள், வாசுகி என்னும் ஐந்துதலை நாக அம்மையாரின் தலைமையில் குமாரதாரா நதி அருகிலிருந்த குகையில் வந்து மறைந்து கொண்டன. அங்கே தங்களைக் காக்கும்படி சுப்பிரமணியரை வழிபாடு செய்தன. சுப்பிரமணியரும் நாகங்களைக் காப்பாற்றினார். இதற்கு நன்றிக்கடனாக வாசுகி, தனது ஐந்து தலைகளையும் விரித்து சுப்பிரமணியருக்கு

குடையாக்கியது. இதன் அடிப்படையிலேயே குமாரதாரா நதிக்கரையில் ஆதி சுப்பிரமணியருக்கு கோவில் எழுப்பப்பட்டது.

குக்கே சுப்பிரமணியா:

சேவல் கொடி வைத்துள்ள இத்தலத்தை ஒட்டி பள்ளுஸ் என்னும் இடத்திலுள்ள குகையில் சிவபார்வதி அருள்பாலிக்கின்றனர். சமஸ்கிருதத்தில் இத்தலம் குக்ஷி என குறிப்பிடப்பட்டுள்ளது. பின் குக்ஷி மறுவி குக்கி சுப்ரமண்யா என மாறி, தற்போது குக்கே சுப்பிரமணியா என்ற பெயரில் அழைக்கப்படுகிறது.

தல வரலாறு:

புராணக்கதைப்படி, சுப்பிரமணியசுவாமி, தாருகாசூரன், சூரபதுமன் மற்றும் மற்ற கொடிய அசுரர்களைப் போரில் வென்று பின்பு, சுப்பிரமணியசுவாமி, தன் அண்ணன் கணபதி மற்றும் மற்றவர்களுடன், இக்குமாரமலையில் தங்கினார்கள். அப்போது தேவர்களின் தலைவன் இந்திரன் மற்றும் மற்ற தேவர்கள் சுப்பிரமணியசுவாமியை மகிழ்ந்து வரவேற்றனர். இந்திரனின் மகளான தேவசேனாவை, சுப்பிரமணிய சுவாமிக்கு திருமணம் செய்து கொடுக்க இந்திரன் விரும்பினான். இந்திரனின் விருப்பத்தை நிறைவேற்ற, சுப்பிரமணியசுவாமி தேவசேனாவை மணந்தார். இத்தேவ திருமணம், குமாரமலையில் நடந்தது. பிரம்மா, விஷ்ணு மற்றும் சிவன் மற்றும் இதர தேவர்கள் எழுந்தருளி, தேவசேனா உடனாய சுப்பிரமணியசுவாமிக்கு மங்கல வாழ்த்துக்கள் தெரிவித்தனர். அன்று முதல் தேவசேனா உடனாய சுப்பிரமணியசுவாமி இங்கு எழுந்தருளி பக்தர்களுக்குக் காட்சி அளிக்கிறார்.

முருகன் தலை மீது ஐந்து தலை நாகருடன் சுயம்பு மூர்த்தியாக அருள்பாலிக்கிறார்.

கோவில் சிறப்பு:

கர்நாடகாவில் உள்ள முருகன் வழிபாட்டுத் தலங்களில் இது பிரபலமானது. பல யுகம் கண்ட கோவிலாக இத்தலம் விளங்குகிறது. முருகப்பெருமான் தரகாசூரனை அழித்த பின்பு, தனது வேலில் படிந்திருந்த ரத்தத்தை கழுவ இக்கோவில் அருகே ஓடும் குமாரதாரா நதிக்கு வந்தார் என தல புராணம் கூறுகிறது. பரசுராமர் தன் தாயைக் கொன்ற பாவம் நீங்க இங்கு நீராடியதாகவும் வரலாற்றில் உள்ளது.

பக்தர்கள் கோயிலுக்குச் செல்வதற்கு முன், கோயிலுக்கு அருகில் ஓடும் குமாரதாரா எனும் நதியில் புனித நீராடிவிட்டு குக்கி சுப்பிரமணியசுவாமி கோயிலுக்குச் செல்ல வேண்டும். மேலும் கோயிலின் முன் மண்டபத்திற்கும் கர்ப்பகிரகத்திற்கும் நடுவே உள்ள கருடனின் வெள்ளித்தூணை வலம் வந்து, வெள்ளித்தூணில் பொதிந்துள்ள கருடனை வழிபட்டால் சர்ப்பங்கள் வெளிவிடும் விஷத்தை எதிர்கொள்ள முடியும் என்பது பக்தர்களின் நம்பிக்கை. டிசம்பர் மாதத்தில் இக்கோயிலில் மூலவரை பூசை செய்யும் நம்பூதிரிகள், வாழை இலைகளில் விருந்து உணவு உண்டபின், அந்த வாழை இலைகளை வரிசையாக பரப்பி அதன் மேல் அங்கப்பிரதட்சனம் செய்தால் நன்மை பயக்கும் என பக்தர்கள் நம்புகின்றனர். 

ஆதி சுப்ரமணியா கோவில்:

குக்கே சுப்ரமணியா கோவிலுக்கு அருகிலேயே ஆதி சுப்ரமணியா கோவிலும் உள்ளது. வால்மீகா எனும் புற்று இந்தக் கோவிலின் கருவறையிலேயே காணப்படுகிறது. மிகப் புராதனமான இந்த புற்று வடிவங்கள் ஆதிசேஷன் மற்றும் வாசுகி என்று வணங்கப்படுகின்றன. மேலும், இக்கோவிலைச் சுற்றிலும் பசுமையான காடுகளும் மலை அருவிகளும் காணப்படுகின்றன. இவை இப்பயணத்தை ஆன்மீகப் பயணமாக மட்டுமின்றி பசுமைச் சூழலைக் கண்டு ரசிக்க ஏற்ற தலமாகவும் இருக்கும்.

சிறப்பு பூசைகள்:

டிசம்பர் மாதத்தில் மூன்று நாட்கள், குமாரதார ஆற்றில் புனித நீராடி முருகனை வழிபடுதல் சிறப்பாகும். குக்கி சுப்பிரமணியசுவாமி கோயிலில் நடைபெறும் சர்ப்ப சம்கார பூசை எனும் நாக தோச நிவர்த்தி பரிகார பூசை சிறப்பான பூசையாகும். மேலும் அஸ்லேஷா நட்சத்திர (Ashlesha Nakshatra) நாளில் செய்யப்படும் நாகதோச நிவர்த்தி பரிகார பூசை சிறப்பாக நடைபெறுகிறது.

தோஷ வழிபாடு:

பாம்புகளை காத்து அருள்புரிந்தவர் இத்தல முருகன். இதனாலேயே ராகு, கேது தோஷம் நீங்க பக்தர்கள் இங்கு வழிபடுவதை வழக்கமாகக் கொண்டுள்ளனர். கால சர்ப்பதோஷ நிவர்த்திக்கு இங்கே சிறப்பு பூஜையும், நடத்தப்படுகிறது. இங்கு பாம்புக்கு திதி கொடுத்தால் பித்ரு கடனைச் செலுத்திய பலனைப் பெறலாம் என்கின்றனர் இத்தலத்தில் உள்ள பெரியவர்கள்.

சர்ப்பதோஷ ஹோமம்:

குக்கே சுப்பிரமண்யா கோவிலில் சர்ப்ப தோஷ ஹோமம் செய்ய திட்டமிட்டீர்கள் என்றால் இரண்டு நாள் இங்கேயே தங்க வேண்டும். முதல் நாள் சர்ப்ப விக்ரகம், முட்டை, கோதுமை மாவில் செய்யப்பட்ட இரண்டு பாம்புகள், கலச தீர்த்தம் வைத்து பூஜை செய்யப்படுகிறது. இரண்டாம் நாள் கங்கா பூஜை செய்து நாகர் சிலைக்கு மஞ்சள், குங்குமம் வைத்து பால் ஊற்றி வழிபாடு செய்கின்றனர்.

திருவிழாக்கள்:

கந்த சஷ்டி, தைப்பூசம், பங்குனி உத்திரம், வைகாசி விசாகம், திருக்கார்த்திகை மற்றும் மகாசிவராத்திரி.

அமைவிடம்:

குக்கி சுப்பிரமணியசுவாமி கோயில், மங்களுரிலிருந்து 105 கி. மீ., தூரத்திலும், பெங்களூரிலிருந்து 317 கி. மீ., தூரத்த்திலும் உள்ளது. புகைவண்டி, பேருந்து, சிற்றுந்து மற்றும் வாடகை வண்டிகள் மூலம் எளிதல் அடையலாம். மேலும் பெங்களூர்-மங்களூர் புகைவண்டித் தடத்தில் அமைந்துள்ள சுப்ரமண்யா ரோடு புகைவண்டி நிலையத்திலிருந்து 15 நிமிட நேர பயணத்தில் சுப்ரமண்யா எனும் கிராமத்தின் நடுவில் உள்ள குக்கி சுப்பிரமணியசுவாமி கோயிலை அடையலாம்.

நன்றிகள் திரு தமிழ் பிரியன் ஐயா அவர்கள்*.  

திருப்பாம்புரம்

தேவாரப் பாடல் பெற்ற தலங்களில் ஒன்றானதும் ராகுவும் கேதுவும் ஒரே சரீரமாக சிவபெருமானை வழிபட்ட  திருப்பாம்புரம் பாம்புரநாதர் என்ற சேஷபுரீஸ்வரர் திருக்கோயில் வரலாறு:

திருப்பாம்புரம் சேஷபுரீஸ்வரர் கோயில் தமிழ்நாடு திருவாரூர் மாவட்டத்தில் உள்ள திருப்பாம்புரம் எனும் ஊரில் அமைந்துள்ள ஒரு சிவாலயம் ஆகும். அப்பர், சம்பந்தர், சுந்தரர் ஆகிய மூவராலும் தேவாரப் பாடல் பெற்ற தலங்களில் சோழ நாடு காவிரி தென்கரைத் தலங்களில் அமைந்துள்ள 59ஆவது சிவத்தலமாகும்.மேலும் இந்தக் கோவில் மிகச் சிறந்த ராகு-கேது பரிகாரத் தலமாக விளங்குகிறது. இந்தக் கோவிலில் உள்ள இறைவனை, ஆதிசேஷன், ராகு மற்றும் கேது, அஷ்டமா நாகங்கள் ஆகியோர் சிவராத்திரியின் மூன்றாம் ஜாமத்தில் வழிபட்டு தங்கள் சாபங்களில் இருந்து விமோசனம் பெற்றிருக்கிறார்கள். இந்தக் கோவிலில் பாம்புபுரேஸ்வரர் என்ற திருநாமத்தில் இறைவனும், வண்டார் பூங்குழலியம்மை என்ற பெயரில் இறைவியும் வீற்றிருந்து அருள்பாலிக்கிறார்கள்.

மூலவர்:சேஷபுரீஸ்வரர், பாம்புரேஸ்வரர்அம்மன்:பிரமராம்பிகை, வண்டுசேர் குழலிதல விருட்சம்:வன்னிதீர்த்தம்:ஆதிசேஷ தீர்த்தம்

புராண பெயர்:சேஷபுரி, திருப்பாம்புரம்ஊர்:திருப்பாம்புரம்

பாடியவர்கள்:அப்பர், சம்பந்தர், சுந்தரர்தேவாரப்பதிகம்:

“துஞ்சு நாள் துறந்து தோற்றமும் இல்லாச் சுடர்விடு சோதி எம்பெருமான் நஞ்சுசேர் கண்டம் உடைய என்நாதர் நள்ளிருள் நடம்செயும் நம்பர் மஞ்சுதோய் சோலை மாமயில் ஆட மாட மாளிகை தன்மேல் ஏறிப் பஞ்சுசேர் மெல்லடிப் பாவையர் பயிலும் பாம்புர நன்னகராரே”-திருஞானசம்பந்தர்தேவாரப்பாடல் பெற்ற காவிரி தென்கரைத்தலங்களில் இது 59வது தலம்.

தல வரலாறு:

 ஒரு முறை கயிலாயத்தில் இருந்த சிவபெருமானை, விநாயகப்பெருமான் வழிபட்டார். அப்போது ஈசனின் கழுத்தில் இருந்த பாம்பு, விநாயகர் தன்னையும் வணங்குவதாக நினைத்து கர்வம் கொண்டது. இதனால் கோபம் கொண்ட சிவன், உலகில் உள்ள பாம்புகள் அனைத்தும் தன்னுடைய சக்தியை இழக்கும் படி சபித்தார். இதனால் உலகத்தைத் தாங்கக்கூடிய ஆதிசேஷன், ராகு-கேது கிரகங்கள் மற்றும் பிற நாக இனங்கள் அனைத்தும் தங்களின் சக்தியை இழந்து தவித்தன. இதையடுத்து அவர்கள் அனைவரும் ஈசனை வேண்டி பரிகாரம் கேட்டனர். அதற்கு ஈசன், “அனைவரும் பூலோகத்தில் உள்ள சேஷபுரி எனப்படும் திருப்பாம்புரம் சென்று, சிவராத்திரி நாளன்று என்னை வழிபட்டால் சாப விமோசனம் கிடைக்கும்” என்று அருளினார். அதன் படியே ஆதிசேஷன் தலைமையில் நாக இனங்கள் அனைத்தும், சிவராத்திரி முதல் சாமத்தில் கும்பகோணம் நாகேஸ்வரரையும், இரண்டாம் சாமத்தில் திருநாகேஸ்வரம் நாகநாதரையும், மூன்றாம் சாமத்தில் திருப்பாம்புரம் பாம்புநாதரையும், நான்காம் சாமத்தில் நாகூர் நாகநாதரையும் வழிபட்டு சாபவிமோசனம் பெற்றனர்.

இது தவிர இன்னொரு வரலாறும் இத்தலத்திற்கு உண்டு. முன்னொரு காலத்தில் வாயுபகவானுக்கும் ஆதிசேஷனுக்கும் தங்களில் யார் பலசாலி என்பதில் போட்டி ஏற்பட்டது. இதனால் வாயுபகவான் தன் வலிமையால் மலைகளை புரட்டி போட, ஆதிசேஷன் தன் வலிமையால் அதனை தடுத்தி நிறுத்தியது.இருவரும் சமபலம் கொண்டதால் கோபம் கொண்ட வாயுபகவான் உயிர்களுக்கு வழங்கும் பிராணவாயுவை தடுத்து நிறுத்தினார். இதனால் உயிரினங்கள் சோர்ந்தன. தேவர்களின் வேண்டுகோளின் படி ஆதிசேஷன் போரில் இருந்து ஒதுங்கியது. பின்னர் திருப்பாம்புரத்தில் உள்ள சிவலிங்கத்திற்கு பூஜை செய்து மன்னிப்பு கேட்டது.எனவே இத்தலம் சர்வ தோஷ பரிகார தலம் என புராணங்கள் கூறுகின்றன. ஆதிசேஷனுக்கு இங்கு உற்சவர் விக்ரகம் உள்ளது.

ராகு, கேது சன்னதி: பிற கோயில்களில் இருப்பதைப் போல் ராகுவும் கேதுவும் தனியாக இல்லாமல் ஒரே சரீரமாகி ஈசனை நெஞ்சில் இருத்தி அருள்பெற்றார்கள். எனவே இத்தலத்து சிவனையும் அம்மனையும் நினைத்து வழிபாடு செய்பவர்களுக்கு சகல தோஷங்களும் நிவர்த்தியாகும் என்பது நம்பிக்கை.

தலச்சிறப்பு:

இத்தல இறைவன் சுயம்பு லிங்கமாக அருள்பாலிக்கிறார். பிற கோயில்களில் இருப்பதைப்போல் ராகுவும் கேதுவும் தனியாக இல்லாமல் ஒரே சரீரமாகி ஈசனை நெஞ்சில் இருத்தி அருள்பெற்ற தலம்.இக்கோயில் சோழர்களால் கட்டப்பட்டது. ஆனை தொழுத தலம் திருஆனைக்கா எனவும், எறும்பு தொழுத தலம் திறு எறும்பூர் எனவும் வழங்கப்படுவதுபோல, பாம்பு தொழுத இத்தலம் திருப்பாம்புரம், “பாம்புரம்” எனப் பெயர் கொண்டது. திருஞானசம்பந்தர் தன் தேவாரப் பாடல்களில் இத்தலத்தைப் “பாம்புர நன்னகர்” என்று குறிப்பிடுகிறார். திருநாவுக்கரசர் தம் திருத்தாண்டகத்திலும், சுந்தரர் தம் தேவாரத்திலும் இத்தலத்தைப் புகழ்ந்து பாடியுள்ளனர். அருணகிரிநாதரும் திருப்புகழில் இத்தலத்தைப் பற்றிக் குறிப்பிடுகிறார். இத்தலத்தில் ஆதிசேடன் வழிபட்டான் என்பது தொன்நம்பிக்கை. நாகதோஷம் நீங்கவும், மகப்பேறு வாய்க்கவும், ராகு, கேது போன்ற சந்தர்ப்ப தோஷங்கள் விலகவும் சிறந்த தலம் என வழிபடுவோரால் நம்பப்படுகிறது.

திருப்பாம்புரம் கோவிலின் ராஜகோபுரம், மூன்று நிலைகளுடன் கிழக்கு நோக்கி அமைந்துள்ளது. ராஜகோபுரத்தின் எதிரே ஆதிசேஷ தீர்த்தம் காணப்படுகிறது. மூலவர் சேஷபுரீஸ்வரர், கிழக்கு நோக்கி வீற்றிருந்து அருள்புரிகிறார். பூங்குழலி அம்மையின் சன்னிதியும் கிழக்கு நோக்கியே அமைந்திருக்கிறது. இது ஒரு ராகு – கேது தோஷத்துக்கான நிவர்த்தி தலம் ஆகும். கும்பகோணம், திருநாகேஸ்வரம், காளகத்தி, கீழப்பெரும்பள்ளம், நாகூர் ஆகிய நாக தோஷ பரிகார தலங்கள் அனைத்தையும் வழிபட்ட பலன், திருப்பாம்புரம் தலம் ஒன்றை தரிசித்தாலே கிடைக்குமாம்.இங்கு ராகுவும் கேதுவும் ஓருடலாக இருந்து, சிவபெருமானை தங்களின் நெஞ்சில் வைத்து வழிபட்ட தலமாகும். எனவே ராகு-கேது பரிகாரத் தலங்களில், இது சிறப்புமிக்கதாக கருதப்படுகிறது.

ஜாதகத்தில் காலசர்ப்ப தோஷம் இருப்பவர்கள், 18 வருட ராகு தசை நடப்பவர்கள், 7 வருட கேது தசை நடப்பவர்கள், ஜாதகத்தில் லக்னத்துக்கு 2-ல் ராகுவோ அல்லது கேதுவோ இருப்பவர்கள், ராகு புத்தி அல்லது கேது புத்தி நடப்பவர்கள், களத்திர தோஷம், புத்திர தோஷம், திருமணம் தடை இருப்பவர்கள், கனவில் அடிக்கடி பாம்பு வருதல் போன்றவற்றால் பாதிக்கப்பட்டவர்கள், இந்தக் கோவிலுக்கு வந்து ஆதிசேஷ தீர்த்தத்தில் நீராடி கோவில் பூசாரிகள் சொல்லும் பரிகாரங்களைச் செய்து, தோஷ நிவர்த்தி பெறலாம். சிலர், ராகு -கேது தோஷங்கள் நீங்க, கல்லால் ஆன நாக வடிவங்களை இந்தக் கோவிலில் உள்ள வன்னி மரத்தின் அடியில் பிரதிஷ்டை செய்து வழிபடுகிறார்கள். 

கோயில் அமைப்பு:மூலவர், இறைவி:

நுழைவாயிலை அடுத்து விநாயகர், நந்தி, பலிபீடம் ஆகியவை உள்ளன. அடுத்து ராஜகோபுரம் உள்ளது. மூலவராக லிங்கத்திருமேனியாக சேசபுரீஸ்வரர் உள்ளார். மூலவருக்கு முன்பாக வலது புறம் விநாயகர், இடது புறம் சுப்பிரமணியர் உள்ளனர். மூலவர் சன்னதியை அடுத்து தனியாக வண்டார்குழலி சன்னதி உள்ளது.

சட்டைநாதர் சன்னதி:மூலவர் விமானத்தின்கீழ் சட்டைநாதர் உள்ளார். இதற்குப் பீடம் மலைஈஸ்வரர் கோயிலில உள்ளது. இக்கோயில் விமானம் வட்டமானதாகும். விமானத்தின் கிழக்குப் புறத்தில் உள்ள சிறிய கோயிலில் சுதையால் செய்யப்பட்ட சட்டை நாதர் உருவம் தெற்கு நோக்கிய நிலையில் உள்ளது. மலைஈஸ்வரர் கோயில்:

கருவறையை அடுத்து தெற்கில் மலைஈஸ்வரர் சன்னதி உள்ளது. இதற்குப் படிக்கட்டுகள் உள்ளன. இதன் வழியாக ஏறிச்சென்றால் பாம்புரநாதர் கருவறை விமானத்திற்கு வர முடியும்.திருச்சுற்று:

திருச்சுற்றில் ராஜ விநாயகர் சன்னதி, வள்ளி தெய்வானையுடன் சுப்பிரமணியர் சன்னதி, வன்னீஸ்வரர் சன்னதி, சண்டிகேஸ்வரர் சன்னதி ஆகிய சன்னதிகள் உள்ளன. திருச்சுற்றில் பைரவர், சூரியன், மகாவிஷ்ணு, பிரம்மா, மாணிக்கவாசகர், சுந்தரர், நாவுக்கரசர், ஞானசம்பந்தர், மகாலிங்கம், சனி பகவான், பாணலிங்கம் ஆகியோர் உள்ளனர். மூலவர் கருவறை கோஷ்டத்தில் விஷ்ணு துர்க்கை, தட்சிணாமூர்த்தி ஆகியோர் உள்ளனர். கோயிலுக்கு முன்பாக எதிரில் கோயில் குளம் உள்ளது.

சிவராத்திரி தொடர்பு:

நாகராஜனான வாசுகியும், இன்னும் சில பாம்புகளும் ஒரு மகாசிவராத்திரி இரவில் முதல் காலத்தில் கும்பகோணம் நாகேஸ்வரர் கோயிலிலும், இரண்டாம் காலத்தில் திருநாகேஸ்வரத்திலும், மூன்றாம் காலத்தில் திருப்பாம்புரத்திலும், நான்காம் காலத்தில் நாகூரிலும் வழிபட்டு பலன் அடைந்ததாகத் தலபுராணங்கள் கூறுகின்றன.

வழிபட்டோர்:

அனந்தன், வாசுகி, தட்சன், கார்க்கோடகன்,சங்கபாலன், குளிகன், பத்மன், மகாபத்மன் ஆகிய எட்டு மகா நாகங்கள் மற்றும் நாகராஜரான ஆதிசேடன்.

அதிசயத்தின் அடிப்படையில்: 

இத்தல இறைவன் சுயம்பு லிங்கமாக அருள்பாலிக்கிறார். பிற கோயில்களில் இருப்பதைப்போல் ராகுவும் கேதுவும் தனியாக இல்லாமல் ஒரே சரீரமாகி ஈசனை நெஞ்சில் இருத்தி அருள்பெற்ற தலம். 

அமைவிடம் :

மயிலாடுதுறையில் இருந்து திருவாரூர் செல்லும் சாலையில் உள்ளது பேரளம் என்ற ஊர். இங்கிருந்து மேற்கே 7 கிலோமீட்டர் தூரம் சென்றால், திருப்பாம்புரத்தை அடையலாம். கும்பகோணத்தில் இருந்து காரைக்கால் செல்லும் சாலையில் கற்கத்தி என்ற ஊர் உள்ளது. இங்கிருந்து தெற்கே 2 கிலோமீட்டர் சென்றாலும் திருப்பாம்புரம் திருத்தலத்தை அடைய முடியும். பேரளம் மற்றும் கற்கத்தியில் இருந்து திருபாம்புரம் செல்ல ஆட்டோ வசதி உள்ளது.

*நன்றிகள் திரு தமிழ் பிரியன் ஐயா அவர்கள்*

இந்தூர் இருக்க வேற ஊர் எதற்கு?

annapurna temple indore

எல்லா உயிர்களுக்கும் பொதுவானது பசி.  அதன் கொடுமை அனுபவித்தவருக்கே தெரியும்.  பசி பட்டினி இல்லாமல் வாழும் நாட்டில் தான் ஒழுக்கம் இருக்கும்.  ஏனெனில் அங்குள்ள மக்கள் தவறான வழிகளில் செல்ல மாட்டார்கள்.  பசியை அழிக்கும் வலிமை பெற்றவள் அன்னபூரணி.  இவளுக்கு மத்திய பிரதேசத்தில் உள்ள இந்தூரில் கோயில் உள்ளது.  இங்கு வருவோருக்கு இந்தூர் இருக்க மற்ற ஊர் எதற்கு என்னும் எண்ணம் ஏற்படும்.

ஒரு சமயம் பார்வதி விளையாட்டாக சிவனின் கண்களை மூட உலகமே இருண்டது.  கோபம் கொண்ட சிவனின் சாபத்தால் பார்வதி முக்பபொலிவை இழந்தாள்.  அவள் விமோசன்ம் வேண்ட காசியில் சத்திரம் அமைத்து அடியார்களுக்கு அன்னதானம் செய்.  முகம் பொலிவு பெறும் என்றார் சிவன்.  அதைப் பின்பற்றி சாபம் நீங்கப் பெற்று அன்னபூரணி என அழைக்கப்பட்டாள்.  தென்னிந்திய பாய்யில் இவளுக்கு இங்கு கோயில் கட்டப்பட்டது.  இது 9ம் நூற்றாண்டைச் சேர்ந்தது.  கோபுரத்தின் உயரம் 100 அடி.     வாசலில் இருபுறமும் கருப்பு நிற பளிங்கு  கல் யானைகள் உள்ளன.  உள்ளே நுழைந்தவுடன் பிரம்மாண்ட மண்டபம் அதனையடுத்து கருவறையில் துர்கை சரஸ்வதி அன்னபூரணி சன்னதிகள் உள்ளன  அன்னபூரணியின் அருகில் அன்ன பாத்திரமும் கரண்டியும் உள்ளன.

தீபாவளியன்று தங்க பாத்திரத்தில் தங்க கரண்டியுடன் அம்மனை தரிசிக்கலாம். அன்று நடக்கும் அன்னகூட் என்னும் உற்சவத்தில் இனிப்பு காரவகைகள் ஏராளமாக தயாரிக்கப்பட்டு நைவேத்யம் செய்யப்படும்.  வட இந்தியாவில் பார்வதியை விட அவளது அம்சமான துர்க்கைக்கே முதலிடம் தரப்படுகிறது.  அவளுக்கு வலது புறம் சரஸ்வதியும் இடதுபுறம் காளியும் உள்ளனர்.

இங்கு 15 அடி உயர வெள்ளை சலவைக் கல்லால் ஆன சிவன் இருக்கிறார்.  பிரகாரத்தில் கிருஷ்ணரின் வாழ்வில் நடந்த சம்பவங்கலை ஓவியங்களாக தீட்டியுள்ளனர். 

எப்படி போவது

சென்னையில் இருந்து இந்தூர் 1494 கிமீ  அங்கிருந்து 5 கிமீ

விசேஷ நாட்கள்

கிருஷ்ண ஜெயந்தி     நவராத்திரி   தீபாவளி   அன்னகூட் உற்சவம்  மகாசிவராத்திரி